BJP te chuan Lok Sabha-a Leader of Opposition Rahul Gandhi a US a tlawhnaa thusawi a neih te chu helh ngar ngar hlein Union Home Minister Amit Shah leh Defence Minister Rajnath Singh te chuan Congress leader thusawi demna lamah hma an hruai zui a.
Rahul Gandhi thusawi chu demin Union Home Minister Amit Shah chuan Congress leader chu ‘he ram thendarh duhtu forces te thlawp tlat’ tiin a sawi a.
“He ram thendarh duhtu forces te thlawp tlatin leh anti-national statement siam chu Rahul Gandhi leh Congress party te tih thin dan a ni. J&K-a JKNC’s anti-national leh anti-reservation agenda thlawp emaw foreign platform a anti-India statement siam te, Rahul Gandhi hian ram security pawisa lovin rilru a ti na thin a ni” tiin Shah chuan a sawi.
“Rahul Gandhi thusawi hian Congress tena regionalism, religion leh linguistics differences te hmanga khichat siam an tumzia a pholang a ni. He rama reservation nuaibo chungchang a sawi hmangin Rahul Gandhi hian Congress te anti-reservation hmelhmang diktak a pholang a ni. A rilrua awm te chu thuin a chhakchhuak ta a ni” tiin Shah chuan a sawi bawk a.
“Rahul Gandhi hnena ka sawi duh chu BJP a awm chhung chuan tute mahin reservation an nuai bo lo ang a, tute mahin ram security an tibuai lovang” tiin Home Minister chuan a sawi bawk.
Shah hian Gandhi an US a Georgetown University zirlaite nena inkawmna an neiha reservation chungchang an zawhnaah Gandhi chuan, “India dinhmun a that hunah reservation nuaibo dan kan la ngaihtuah ang a, tunah chuan India dinhmun a tha lo” tiin a sawi.
BJP te chuan Congress leader in Constitution humhim ngai tia campaign a kalpui chu ‘a lem mai mai’ tia sawiin reservation chungchanga a rilru puthmang dik tak pawh lailanin a awm ta an ti bawk.
Reservation dodalna hi Rahul Gandhi legacy a ni tia sawi bawkin senior BJP leader Ravi Shankar Prasad chuan prime minister hlui Jawaharlal Nehru, Indira Gandhi leh Rajiv Gandhi te pawh kha caste-baste reservation dodaltute vek an ni a ti bawk a.
Prasad chuan Opposition’s INDIA bloc member– DMK chief M K Stalin, RJD supremo Lalu Prasad, Samajwadi Party president Akhilesh Yadav leh leaders of the Left parties te chuan Rahul Gandhi thusawi duhlohna lantirna an sawi ngei tur a ni a ti bawk a. “Congress tena reservation nuaibo an tum a nih chuan BJP te chuan na takin a dodal dawn a ni,” tiin a sawi bawk.
BJP tena Rahul Gandhi thusawi an beih vakna chhan hi tun hnai lawka Assembly poll Maharashtra leh Jharkhand a neih tur hisap nia ngaih a ni a. Lok Sabha inthlan atanga che chhe tak BJP te chuan Gandhi thusawi chu behchhana hmanga anti-reservation tia Opposition te chhuaha swing voter te hui an tumna anga ngaih a ni.
US a tlawha thusawina a neihah Rahul Gandhi chuan BJP te leh an ideological parent te chu sawiselna hle in chu chu BJP te chuan an la na hle a ni.
Gandhi chuan Lok Sabha poll hnu atangin BJP te hlauhna a bo tawh ti bawkin, “inthlan result chhuah hnu lawkah tute mahin BJP leh Prime Minister of India te hlauhna an nei tawh lo. Chu chu hlawhtlinna turu tak niin Rahul Gandhi emaw Congress hlawhtlinna a ni lo va, India mipui ten Constitution siam danglam tumna an duhlohzia pholanna zawk a ni,” tiin Rahul chuan a sawi.
BJP ten Rahul Gandhi helh ngar ngar
