BJP thawhpui upa ber Shiromani Akali Dal (SAD) te chuan Punjab a loneitu tena lungawilohna nasa taka an lantir mek laiin National Democratic Alliance (NDA) an chhuahsan thu an sawi.
SAD president Sukhbir Singh Badal chuan thutlukna chu Chandigarh-a party core committee meeting neihnaah an siam thu a sawi.
“Central sorkar hian loneitute ngaihsak map lovin agriculture sector bill chu a kalpui lui a ni. Rajya Sabha a thil thleng te kha tute pawhin an hre vek a. He sorkar-ah hian kan tel ve nachungin Harsimrat Kaur Badal chuan heng bill duh loh avang hian Minister a nihna a bansan tawh a. He thil chungchang hi hruaitu dang te nena kan sawikhawm hnuah NDA chhuahsan kan ti ta a ni,” tiin a sawi.
Tihian SAD te hi NDA ally a party lian inhnukdawk pathumna niin a hmain Shiv Sena leh TDP te an lo inhnukdawk tawh bawk.
Badal chuan NDA chhuahsan an tihna chhan chu Cente-in loneitute hnena MSP pek a tiam duh loh avang leh Punjabi leh Sikh kaihhnawih thilah a chawmawlh tlat a, Jammu and Kashmir-ah pawh official language ah Punjabi a telh duh lo, a ti bawk.
NDA alliance chhuahsan tura nawrna Akali Dal chuan nasa takin farmers bill avangin an tawng a. A tirah chuan SAD ten ordinance an thlawp a, a hnuah an duh leh ta lo a ni. Hei hi a chhan ber chu mipui nawlpui tena an duhloh em avanga hruaitu tena thu an zuk leh vang nia ngaih a ni.
Union Cabinet a SAD aiawha awmchhun Harsimrat Kaur Badal chuan bill duh loh avangin minister nihna a lo bansan tawh bawk a ni.
Opposition Congress leh Aam Aadmi Party te chuan Akali Dal te chu agriculture bill issue ah lonitute an thlawp a nih chuan NDA chhuahsan turin an ngen tawh bawk.
(THE AIZAWL POST – Ramchhung)
Full>> ePaper Subscribe
