Thorang bialtu MLA, term kal meka Congress Legis
lature Party leader Zodintluanga Ralte chuan BJP thil tum ber chu Congress tihchhiat a ni tiin a sawi a, inthlanpui lo awm turah Mizoramah Congress tihchhiat an tum niin a sawi.
MLA pakhat an neihna Mizoramah BJP-in MLA tam zawk neih an tum a, Zodintluanga chuan BJP hian India ramah Congress tihchhiat an tum a, chu chu an tum ber a ni tiin a sawi a, Mizoramah pawh Congress tihchhiat an tum a, chumi atan chuan BJP hian kawng hrang hrangin hma an la niin a sawi.
“Congress tihchhiat hi BJP thil tum ber a ni a, Mizoram inthlanah pawh chu chu an tum mek. Chu chu mipui hian an phal ang em?” Zodintluanga chuan a ti.
“Congress min tihchhiat hi an tum a, kei pawh min target a, ka tlak hi an duh em em a ni,” a ti a, “MNF chu NEDA-a tel an ni a, kan hre vek a. ZPM chuan BJP nena an inkar hi an zep a, an sawi tha duh lo a,” a ti bawk.
BJP-in sum an hmang a nih pawhin Mizoramah awmzia a neih a rin loh thu a sawi a, Mizoram mipui hi suma lei theihah a ngai lo tih a sawi.
“Suma inlei chungchang hi, Mizoramah hetiang hi thil ni thei tak tak a ni dawn em ni?” a ti a, “Kan insawi chhe lutuk te pawh a ni mai thei a; pawisa kengin mi inah va kal ila, ‘Min vote ula, hei hi kan pe ang che u,’ ti ngam tur tunge? Mizo mipuiin chutiang kan pawm lo,” a ti.
‘BJP tum ber chu Congress tihchhiat’
