Delhi Minister Aitishi hnimhnai tak pakhat chuan BJP a zawm lo a nih chuan thlakhat chhungin Enforcement Directorate te a hmachhawn dawn tia a hrilh thu a sawi a. Hei mai bakah hian Atishi chuan AAP senior leader pali te amah telin man an ni thuai dawn tia hrilh a nih thu a sawi.
Delhi a press conference a neihnaah Atishi chuan BJP te chuan AAP leader te lung in a khung zelin party chu tihchhiat an tum a ti bawk a.
“Ramlila Maidan a Pathiannia punkhawm atang khan Chief Minister Arvind Kejriwal man ringawt chuan party an tichhe thei dawn lo tih an hria a ni” tiin Atishi chuan a sawi.
Delhi senior minister chuan tun atanga htla hnih chhungin ED te chuan amah mai bakah Saurabah Bharadwaj, Durgesh Pathak leh Raghav Chadha te chu an raid ang a, chu mi hnuah thu zawhfiah atana kovin an man zui ang a ti bawk.
Arvind Kejriwal chu Chief Minister atanga a ban a ngaihna a awm lo bawk a, charge-sheet a ni lova excise policy case-ah thiamloh chantirin a awm hek lo. Chu mai ni lovin Delhi Assembly ah majority a nei bawk, tiin Atishi chuan a sawi bawk.
Chief Minister atanga a bang a nih chuan BJP tena sorkar tihthluk nana case dik lo hmanga Chief Minister te lung in a an khung zelna langsar leh chiang a ni ang tiin Atishi chuan a sawi bawk a.
“BJP te hian Kejriwal lung in a khung chuan AAP ah inlungrualna a thlen turah an ngaih chu a ni lo tih an hrefiah tawh a, chuvang chuan second-line leader kei pawh telin Saurabh Bharadwaj. Raghav Chadha leh Durgesh Pathak te chu min man an tum a ni” a ti.
“BJP te hi kan hlau lo va. Arvind Kejriwal sipai leh Bhagat Singh zuitute kan ni a. Kan ram him nan a tawp thlengin kan bei ang” tiin a sawi bawk.
Bharadwaj pawhin Atishi BJP zawm tura ‘sawmna’ chu langtlang taka invauna tiin a sawi bawk a. “Kejriwal telin kan hruaitu pali an man tawh chungin AAP chu a la dam zel. Tunah chuan hruaitu thachhang dawltute chu lung in a khung leh an tum a ni. A hmasa berah keimah min man ang a, a dawtah Atishi chutah Raghav Chadha leh Durgesh Pathak te an ni ang” tiin a sawi bawk a. AAP chu a ngelnghet tia sawiin BJP te chuan an top leader te man vang maiin party a kehchhiat ring suh se a ti bawk a. “BJP te hian Lok Sabha seat 400 chu an elpui te lung in a khungin neih an tum a ni” tiin a sawi bawk.
Delhi chief minister Arvind Kejriwal chu March 21 khan ED te chuan tuna nuaibo tawh Delhi excise policy case ah money laundering kalpui tia puhin an man a, Thawhtanni khan April 15 thleng judicial custody a awm turin court chuan a ti leh a ni.
AAP te chuan BJP te chu an legislator te lei tum leh party tikeha President’s rule a Delhi dah tumah an puh a. AAP MLA Rituraj Jha chuan BJP zawm turin Rs 25 crore in an thlem thu a sawi bawk.
AAP pum liquor scam ah inhnamhnawih – Delhi BJP chief
Delhi BJP chief Virendra Sachdeva thung chuan Atishi chuan dawt a sawi a ti a. Aam Aadmi Party pum chu ‘liquor scam’ ah an inhnam hnawih vek a, an hruaitute chu a tu ber nge man leh tur tihah an buai a ni a ti thung.
Delhi BJP chief chuan, “Kejriwal an ecise policy case accued leh AAP leader Vijay Nair lung in tang mek chu Atishi leh Bharadwaj hnenah a in report thin a tih atang khan AAP leader te an inbei tih a hriat a ni. Atishi chuan a himna duhna lamah Chadha leh Pathak te chu buainaah a hnuklut a ni” a ti bawk.
BJP zawm loh chuan man ni dawn ti
