K-pop girl group BLACKPINK leh Selena Gomez te zaihona ‘Ice Cream’ music video chuan YouTube-ah vawi tlukledingawn en a hlawh ta a, BLACKPINK tan vawi tluklehdingawn en hlawh thei video pariat an neihna niin, Gomez tan a palina a ni ve thung.
He hla hi 2020-a an tihchhuah kha niin, a video-ah hian BLACKPINK memberte- Lisa, Jennie, Jisoo leh Rose te leh Gomez hi an lang a, an panga hian balloon senno lianpui chhungah te an lamkual vel kha a ni. A hla hming ang chiahin ice cream hmuh tur pawh a tam, Gomez pawh ice cream truck nen pawh a rawn a lang a, BLACKPINK member te hi ice cream parlor-ah te paw cone keng chungin an lam deuh hah hah bawk e.
He hla hi BLACKPINK studio album hmasa ber ‘The Album’ atanga an single pahnihna a ni a, Billboard Hot 100 (US singles) chart-ah No.13 a kai a, a album pawh hi Billboard 200 (US albums) chart-ah No.2 a kai thei nghe nghe a ni.
BLACKPINK hian an single album ‘Square One’ chu 2016 khan tlangzarhin, rimawi khawvelah an rawn intar chhuak tan kha a ni a, khata tang khan K-pop khawvela hriatlar an nih mai bakah khawvel huap pawhin hmeichhe group lar bera chhal ngam an ni ta hial a, Hot 100 chart a lang thei hla 11 nei tawhin, an studio album pahnihna ‘Born Pink’ chu Billboard 200-ah No.1 kaiin, group member pali te pawh hian solo-in Hot 100 a lang thei hla an nei vek tawh bawk a ni.
BLACKPINK & Selena Gomez ‘Ice Cream’ 1B view club-ah
