Russia Wagner mercenary group te chuan Niger dinhmun chiang lo chu remchang hman an tum tiin US Secretary of State Antony Blinken chuan a sawi.
Niger hi President Mohamed Bazoumi paihthlak a nih hnuah Junta te thuhnuaiah a awm mek a. Tun hnaiah coup leaders te chuan Wagner te hnen atangin puihna an dil tia sawi niin Wagner te hi thenawm Mali rama inbun lawksa an ni bawk.
Blinken chuan Niger coup chu Russia emaw Wagner te tih nia a rin loh thu a sawi a. Mahse Sahel region ah Wagner te chuan nasa zawka thuneih tuma tan an lak hlauhthawnna a neih thu a sawi a.
“Niger a thil thleng leh thil thleng zui mek te hi Russia emaw Wagner te fuihpawrha thleng niin ka ngai lo. Mahse, remchanga lak erawh an tumah ka ngai,” tiin Blinken chuan a sawi a.
“Wagner-te luhchilh hmun reng reng chu a bo zel a, thihna, chhiatna leh inruksaknain a zui zel a ni,” tiin Blinken chuan a sawi a. “Himlohna a nasa zawk zel,” tiin a sawi bawk a.
Ram danga an chetlakna hmunah te chuan thil tha engmah put luh an nei ngai lo, tiin a sawi bawk.
US leh France te chuan Niger ah hian military base an la nei ve ve a, Niger hi tun hma atang tawha jihadist te beih nana hmunpui ber pakhata neih a ni a. Niger hi Mali a sipai sorkar a din hnuah French sipai te chuan hmunpuiah an hman zui a ni bawk.
Wagner te hian Central African Republic (CAR) leh Mali ah te sipai sang chuang an dah nia sawi niin heng hmunah te hian sumdawnna lian tham tak tak kalpuiin chumai bakah Russia-in diplomatic leh economic relation a siam nana remchanga hman an ni bawk.
Hetih lai hian Niger president hren awm mek chuan Washington Post a article a ziahah Wagner te chu an hlauhawm thu a sawi a. “Civilian sorkar paihthlatute leh an thawhpui te nena tangrualin central Sahel region pum hi Russia te kutah Wagner Group te kaltlangin a lut thei a ni,” tiin a ziak hial a.
Wagner te hian Niger ram chhung an lut tawh em finfiahna a la awm lo chungin Wagner-a inziak lut telegram channel grey Zone te chuan fighter 1,500 chuang an lut tawh tiin a sawi thung.
Blinken-an Wagner ten remchang lak tum ti
