Bodo leh tribal buaina vangin
internet tithi, sipai tir lut
Thawhtannii tlai atanga Bodo leh Adivasi hnam inkara buaina chhuak avanga boruak tang tak awm zui avangin Assam sorkar chuan Kokrajhar-ah inkhuahkhirhna a kalpui a, mobile internet tithiin sipai leh Rapid Action Force (RAF) sipaite a dah lut bawk.
Bharatiya Nagarik Suraksha Sanhita Section 163 hmangin vantlang hmunah mi pali aia tam awm khawm leh district chhunga lungawi loh lantirna ang chi reng reng khapna thupek chu Thawhlehni khan chhuah a ni.
Davos, Switzerland-a World Economic Forum chhima awm mek, Chief Minister Himanta Biswa Sarma-a chuan Kokrajhar leh Chirang district-ah mobile internet tihthih rih a nih thu X-ah tar langin an state hotu lawkte nen thil thleng an inhrilh reng tih a tar lang.
Sorkar hian Chirang district hmun thenkhatah Thawhtanni zana Kokrajhar-a Mansingh Road-a thil thleng avanga dan leh thupek kenkawh a hniam avangin mobile internet tihthih lailawkna tur thupek a chhuah.
Thawhtanni zan khan Bodo pathum chuanna Scorpio-in Mansingh Road, Kokrajhar PS huam chhung, Karigaon outpost chinah hian tribal pahnih an su a. Hemi chhanlet nan hian tribal-ten Bodo-te hi sawisain pakhat a hmunah a thi a, pakhat hi Thawhlehniah thiin pakhat dang enkawl mek a ni a, an lirthei an hal bawk niin thupekah hian tar lan a ni.
“Kokrajhar district-a hetiang thil thleng avang leh an thenawm, BTR (Bodoland Territorial Region, Assam-a autonomous division) district-ah kang kaia dan leh thupek kenkawhna tha zawk a awm theih nan khuahkhirhna hi siam a ni,” tiin Assam Additional Chief Secretary Ajay Singh-a chuan thupekah hian a tar lang bawk.
Thawhlehni tukah khan Bodo leh Adivasi hnam hnih chuan Karigoan outpost bul lawkah national highway an dang ve ve a, lirthei ke leh in tlem an hal bawk. Mipuiin Karigaon outpost leh pisa an suasam nual bawk.
Sarma chuan district-a officer lawkte leh state thuneituten a thil thlengte an ngaihven reng a, RAF leh sipai telin, central armed police pawh vantlang him nan dah luh an ni tih X-ah hian Asamese tawngin a tar lang.
“Dan leh thupek kenkawh that a nih theih nan Kokrajhar leh Chirang district-ah internet service tihthih lailawk a ni,” a ti a. Vantlang hruaitu leh politic-a mipui aiawhte chu boruak a muanawm theih nan thawkho turin a ngen a. “Mi tinte sorkarin muanna a awmtir leh theihna tur leh vantlang himna tura hmalaknaah sorkar pui theuh turin ka ngen a ni,” a ti.
Bodoland Territorial Council Chief Executive Member Hagrama Mohilary-a chuan thil thleng chu vanduaithlak a tih thu sawiin an awmna velah muanna tichhe turin hnam hniha mi ni lo mi dang ‘third force’ inrawlh an awm niin a sawi.
“Bodoland-ah hian ram leilung fate leh Bodo hi kum tam tak muang takin kan lo khawsa ho tawh a. Kan inunauna tichhe turin mi dang an inrawlh niin ka hria a ni,” a ti a. Tute mah boruak tichhe zawng leh tharum thawh zawnga che lo turin a ngen bawk.
Bodo leh tribal buaina vangin internet tithi, sipai tir lut
