Daily Newspaper

Bollywood actress Mishti Mukherjee a thi; a thih chhanah keto diet an mawhpuh

37

Bollywood actress Mishti Mukherjee, kum 27, chu October ni 2 khan Bengaluru-a damdawi inah kal tha lo (kidney failure) avangin a thi a, hetianga kal tha lo a neihna chhanah hian a keto diet an mawhpuh dueh tlat mai.

Mishti Mukherjee hi Bollywood film bakah Telugu leh Bengali film bakah music video thahnem takah a inlan tawh a, 2012 khan Bollywood movie ‘Life Ki Toh Lag Gayi’-ah changin hei hi Bollywood a luhchilh tanna a ni. 2013-ah ‘Main Krishna Hoon’-ah inlanin, 2014 khan ‘Kaanchi: The Unbreakable’-ah a chang leh a, hei hi a larchhuah deuh tak takna niin, 2016-ayh ‘Great Grand Masti’, 2017-ah ‘Begum Jaan’ a chan bakah 2019 khan ‘Manikarnika: The Queen Of Jhansi’-ah te pawh a inlan ve leh bawk. Heng bakah hian Bengali leh Telegu project hrang hrangah a inlan bawk.

Mishti thih thu a chhungten an puannaah chuan, “Actress Mishti Mukherjee, film leh music video thahnem taka a theihna lo lantir tawh chu a awm ta lo. Keto diet avangin a kal a chhia a, Zirtawpni zan khan na tak tuarin a thaw a lo tawp ta. Theihnghilh tawh loh tur channa nasa tak a ni. A thlarau chawl hahdam rawh se,” tiin an tarlang.

Keto diet chu eng ni? Keto diet chu high-fat, protein tam vak lo, carbohydrate hniam tak a ni a, intihcher tumte tana diet plan pakhat a ni. Keto diet tih dan tur dik takah chuan nikhatah fat 75%, protein 20% leh carbohydrate 5% chauh ei leh in atanga lakluh tur a ni. A tum ber chu ei leh in atanga carbohydrate paih deuh vek a ni a (carbogydrate chu kan taksain fuel/ thahrui atan a hmang thin), a aiah taksa a thau awm chu chakna/thahrui atan hman a tum a ni. hetiang hi ketosis an tih chu a ni.

Ei leh in atanga mamawm lakluh tam (high-fat diet) hian taksa tan thatna a neih rualin that lohna pawh a nei a, a bik takin hetiang diet hi rei tak kalpui a nihin a tha lo lehzual niin mithiam ten an sawi a, kal (kidney) a tihah a, kala lungte awm (kidney stone) te pawh a siam thei. Keto hi high-fat diet a ni a, protein an tam lo thung a, hei hi kal tha lo nei sa tan fimkhur lehzual a ngai niin an sawi bawk.

Fortis Memorial Research Institute, Gurugram-a Nephrology & Renal Transplant lama an Director leh HOD ni bawk Salil Jain chuan keto diet-ah chuam mawm a tam a, protein a awm nual bawk a, carbohydrate a tlem hle thung a, heng chaw hi kan ei a, a bik takin sa tisen chi kan ei nasa bawk a nih chuan kala lungte awm theihna risk a tisang thei niin a sawi a, “Kal tha lo nei sa tan phei chuan kal hnathawh a tibuai thei. Sa lam chi ei tam hian kan zun a ti-acidic a, chu chuan zunah calcium a titam thin,” a ti.

Balaji Action Medical Institute, New Delhi-a Senior Dietician Priya Bharma chuan, “Keto diet hi diet schedule zawm harsa tak mai a ni a, rihna paih ngawr ngawr a tum a ni. Mawm leh protein lakluh tam avangin taksa hriselna nghawng thei a ni,” a ti a, hetiang diet plan hi tum khatah ni 45 aia rei kalpui loh tur niin a sawi bawk.

(THE AIZAWL POST – Thalaite Huang)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy