Daily Newspaper

Book Review: “Ka Damchhan” – Joseph L Ralte

18

-R. Ramhmangaiha
Hnam Chhantu

“Ka Damchhan” tih lehkhabu hi Pu Joseph L.Ralte–in lehkhabu pakhat ‘The Monk who sold his Ferrari’ behchhana a tawnhriat nun khawhar thlak tak leh beidawnthlak tak atanga a lo harhchhuah leh dan ziahna chanchin ngaihnawm tak a ni.

Kum 2008 khan chhut khatna hi ZORIN COMPUGRAPHICS Treasury Square, Aizawl atanga chhut niin copy 1500 zet chhut a ni a, hun rei lo te chhungin hralh zawh a ni thuai a, a bu chhung leh hmelhmang tidanglam hret hretin kumin 2020 hian a chhutu ngai bawkin chhu lehin Copy 500-zeta tihpun belhin copy 2000 chhut a ni. A bu pumpui hi vai phek chhiara chhiarin phek 124 leh a behbawm thuhmahruai te, chhiar hmasatute comment ngaihnawm tak tak te nen chuan phek 132 a ni thung.

Lehkhabu chhah ul leh min mawlh run tham a nih lohna hian chhiar a tichakawm a, a hralh thuah pawh kawngro a sut ngei ka ring. Ziaktu thenkhatten an lehkhabu ziah, tute tan emawa an hlan thin ang bawkin he lehkhabu ziaktu hian a hun tawn rapthlak tak chunga hnehna hlado chhamtu a nihzia entirna atan manganna tawk tawhte tan thawhlehna a awm thu kawhhmuhtu ni turin he lehkhabu hi a hlan a, chutiang mi, harsatna tawk tawh leh tawk mektute chu hmangaih leh duhsak takin he lehkhabu hmang hian kaihthawh leh a duhzia tilang thei turin hetiang hian lehkhabu phek hmasa berah chuan a ziak a.

“Hringnun zinkawnga inchhuih tlu palh a, beidawnna leh lungngaihna ruama tlu mekte pualin ka hlan e. Nangmahni-ah hian ni, thla leh arsi-te an inher vel a. Heng zawng zawng Siamtu hian thiltihtheihna a pe che u a. Chu thiltihtheihna awm hai chhuak tura in beih hian siamtu a lawm a ni,” tiin.
Lehkhabu chhuak dangte ang lo takin chhut khatna chhuah a nih khan Pi Kimi Vaiphei, Delhi-a awm Rev.Manga nupui chuan a lo chhiar fuh hle ni tur a ni, a ziaktu phalna lain Vaiphei tawngin a letling hial a ni tih chu ziaktu thuhmaah hian kan hmu bawk. Hei hian he lehkhabu hi lehkhabu namen a nih lohzia a hrilhfiah thawkhat hle awm e.
Lehkhabu tha leh tha lo tehfung hi a inang vek lo thei a, keia teh ve danah chuan, lehkhabu tha chuan mihring nunah hlutna a neiin a chhiartu rilru chu a tha zawngin a hruai thei tur a ni a. Chutiang kawngah chuan he lehkhabu ‘Ka Damchhan’ tih hian belh leh paih tur awm lo khawpin a tum a pan dik niin a lang. Chutiang chu a nih avangin Pi Kimi pawh hian tawng danga lehlin a duh hial ni.

A ziaktu hian a lehkhabu behchhante a rawn ziak lang vek chungin amahah hian themthiamna danglam tak awmin a lehkhaziak chu chhiar chakawm takin thupui a vuah hrang thliah a. Hlawm 11-ah thenin hlawm tin hi awmze hrang a neihtir thliah thliah laiin a thu tum erawh a inzawm tha em em hlawm a ni.

He lehkhabu ka chhiar laia ka rilrua lo lang thil pakhat chu, hmanlai Mizo pipute nunah khan tlawmngaihna te, hmangaihna te, rinawmna te leh taimakna te, aia upa zahna te, chhumchhia, hmeithai khaichhuah te, chak lo zawk dawmkan duhna thinlung te a lo piang tawh a, chung awmdan mawi te chu zawlbukah an lo inzirtirin mikawlh sakawlh laka zam lo tura, khawtlang tana mi tangkai ni turin huaisenna an lo inzirtir thin a. Chung kawngah chuan Pathian hming an lam lem lova, Lalpa tih lam an hawi hek lo. Mahse an nun chuan vawiin kan Bible-in Pathian thu tia min zirtir hi atakin an keng lawi si. Chutiang bawkin he ‘Ka Damchhan’ tih lehkhabu hian vawikhat mah Lalpa tih lam leh Pathian tih lam a sawi ri lo chungin a zirtirna erawhin Pathian tih nun chu a kawk ngut lawi si hi a chhiar tinuamtu tak a niin ziaktu pawhin hei hi min kawhhmuh a tum pakhat chu niin a lang.

A changtupa hi Puia tih ngawt a ni a, Puia chuan tunlai tawng takin hero a nei a, a hero chu a pu hlui Malsawmsanga chu a ni a. Malsawmsanga chuan a nun inhnangfakna atan worship a nei hrang ve leh a, a worship chu Lentlang puithiam Lalruaia leh a hote Serhhranho an tih mai te chu an ni thung. Chung puithiamte chu Phawngpui tlang thut vel hmun fianrial takah mipui mimir tlawh pawh lohvin nun zalen leh hahdam takin an khawsa a. Chung nun zalen tak mai chu anmahnia awm thiltihtheihna an kaihthawh avanga lo nei ta niin a ziak a. Hei tak hi a thu laimu pawh niin a lang.

A ziaktu hian chhiar chakawm takin thupui hmasa berah hian ‘Kohluihna Aw’ tiin thu a rawn tan a. A pu mi hausa leh mi te hneh thei em em tu, la naupang takin thih ngam khawpa natna BP sang avanga phai lam pan a ngaih thu thinthawng takin a rawn ziak a. Neurology lam enkawlna hmun Guwahati-ah enkawlin dam tha takin Aizawl a rawn chuang chhuak leh a. Amaherawhchu, a sumdawnna thang duang tak chu a pu damloh hnu atang chuan a kal tluang hlei thei ta lo va, hun rei lote chhungin sumdawnna khawvela hero ni mek chu a lo zero ta thut mai, a duhthusam zawng zawng chu vawm bo sak vek a ni a, hmasawn chu sawi loh, leibatna namen lo nen a nun chu chhuah leh mai theih rual lovin harsat manganna khurah a lo lut ta zawk a.

He phurrit tak avanga a manganna chuan dam thlakhlelhna te pawh a nei loh tir hial thin. A mangan luat avangin mi tam takin mahni nunna an chhah thu te leh zu hmun sa hmuna an boral tak thute chu mak a tih loh thu ziakin a chhungte a hnutchhiah a, kohluihna aw hria nia insawiin khawi lam nge a pan tak tih sawi lovin a in chu a chhuahsan ta a. A khuangcherbo ta hmiah mai a ni. Pu Joseph-a hian a bung dawt chhiar chakawm takin he bung tawpah hian ‘Chu kohluihna Aw chu engtiang tak nge ni ang le?’ tiin a bung a khar. Ziak chhunzawm zel lo mahse bu thupui then khatna chhiar tawhtu tu pawhin then hnihna thil lo thleng tur hi mutsan theih chi rual a ni tawh lo. Tichuan A hma aimaha thu chhiar chakawmin ti hian then hnihna chu a rawn dah a. ‘Mikhual danglam tak ka nei” tiin. Heta, “ Ka nei,” titu hi Puia a ni a, a mikhual chu a pu Malsawmsanga chu a ni. “Pu Malsawmsanga a lo kir leh ta” tiin thupui hi dah ta se, a chhiar chakawmna a tlahniam thei hle awm e. He thupui then chhungah hian chhiartuten kan hriat chak em em turin Malsawmsanga hian Kohluihna Aw a hriat dan leh chu lam pana a kal chhuah hnua a thil tawn chanchin te a sawina chu a ni.
Tawngtaimi Pang pitar pakhatin Phawngpui tlang panga Lentlang khuaa serhhran ho kha hmu turin thurawn a lo pe a. Tichuan Sangau khuaah pheiin pitar thurawn ang zelin chu khuaah chuan Pu Nguntlinga a va hmu a, Pu Nguntlinga chuan Serhhran ho hnenah chuan a hruai thleng a. Chhiartu thinlunga Malsawmsanga thil tawn hriat chakawm tak chhiar turin |hen thumna chu “Lentlang puithiamho ke bulah” tiin thupui a rawn dah leh a. Puithiam ho hnena a thil zir chhuah zawng zawng chu thupui 10-ah thenin Puia leh a pu chu inkawmin beidawnna khur atanga chhuah leh dan thuruk te, mahni rilru hneh dan leh mi te chhiar theih tur nun duhawm tak neih dan te, hlimna thuruk leh tar te pawhin an vanglai nun an neih let leh theihna thuruk a zir chhuah dan chanchin chu duham takin an inhrilh a, chu thuruk hlu tak mai leh mi te tana inpekna leh engkima hnehtu kan nih theih dan thuruk inthup zirchhuahna bu a ni ber.

Chu thurukah chuan mihringte hian kan rilru kan thunun theih phawt chuan tih theih loh reng kan lo nei lo a ni tih leh chung rilru thunun theihna tura tih tur hrang hrangte chu pawmawm taka ziak a ni a, kan pawn lam lan dan aiin kan chhungril nun tak chu a pawimawh zawk thu te, leh kan dam chhan ber chu mi dangte tana thil tha tih hi a ni e tiin a tlang a kawm a ni.

A tawp berah chuan harsatna paltlang lo tumah a awm theih loh va, dik leh fel taka ti thei tur erawh chuan vawi tam tak hlawhchhamna ruama luh a ngaih thin thu chu tihian tawi fel takin a ziak a. |hen lina thupui “Mite chhiar theih nun neihna thuruk” tih kharnaah heti hian a ziak, “Thal kaptuin a tum tak a kah fuh chuan vawi za tam tak a lo kap thelh tawh tih hria ang che, Hlawhchhamna leh beidawnna atanga hlawkna chhar chhuah theih hi Siamtuin min zirtir a tum a ni. Hlawhchhamna hi hlau suh, i thian a ni,” tiin.

He lehkhabu hi vawi hnih khat chhiara duh tawk mai lovin, kan taksa chakna tura nitin chaw kan ei anga chhiar fo thin tur, lehkhabu hlu tak niin ka hria. A ziaktu Pu Joseph L Ralte hian a bu hma lama zirtirtu chuan zir lo thei lovin min siam a, a tih hi mihring chunga thu neitu Pathian a sawina niin a lang. Chu mi thu zawm apiang te chu mi vannei an nihzia thu thiam takin a ziak a ni deuh ber mai. I mangananna hneh tura ke i chheh that ngam chuan he lehkhabu hian nasa takin a pui thei ngei chein ka ring tlat a ni.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy