Boruakalhthei put tihtawp tumna thawk tha tawk lovah puh

Boruakalhthei put tihtawp tumna thawk tha tawk lovah puh
Assam-a ONGC tuialhthei thlitfim loh khur atanga boruakalhthei put chu ni sasarihna a pum ta a, Chief Minister Himanta Biswa Sarma-a chuan sorkar laipuiah lehkhaa thawnin company hian hma an la tha tawk lo niin a ziak.
Union Petroleum Minister Hardeep Puri-a hnena a thlenah Sarma chuan boruakalhthei put chu tihtawp tum ni ve bawk mah se tual chhungmiten ONGC hian ‘hmanhmawh leh inpe takin’ an bei lo niin an sawi tih a thlen.
“Barichuk boruakalhthei inphuh chhuak chungchanga kan thil tawn hi Union Minister Hardeep Puri-a hnenah ka thlen a. ONGC chu an khur tihphui tuma an beihnaah hian an theihtawp an chhuah tawk lo tih ka hrilh a ni,” tiin chief minister hian X-ah a tar lang.
State sorkar chuan theihtawpin a tuartute chhawmdawlna tur an ngaihtuah laiin ONGC-in nun dan phung pangngai a awm leh theihna turin thil an ti tawk lo tih a sawi bawk.
ONGC khur atanga boruakalhthei put avang hian a bul hnai khaw eng emaw zata chengte buaiin chhungkaw 330 chu an in atanga chhuahtir an ni a, state sorkarin an mamawh zualpui leh an himna tur a ngaihtuah tih chief minister hian a sawi.
“ONGC hi a hmunah technical leh hruaitu tha tir tura ti turin ka ngen che a, nasa zawka bei turin min ngensak la, a hma thei ang bera he thil hi chin fel a niha a tuartuten nun phung pangngai an neih leh theih nan hma min laksak turin ka ngen a che,” tiin Sarma hian Puri-a hnenah hian a thlen.
Barichuk, Bhatiapar-a ONGC Rudrasagar oil field-a Rig No SKP 135-a Well No RDS 147 atang hian June 12 atang khan boruakalhthei hi a put tan a. Mi mal firm, SK Petro Services-in sorkar hnuaia mi, Maharatna company hnuaia hna an thawh mekna hmun a ni.
Assam sorkar hian Thawhlehni khan boruakalhthei put tuartu chhungkaw 350 chuang chu puihna Rs 25,000 theuh hlan turin a ti.
Assam Pollution Control Board (APCB) chuan a chhehvel boruak chu Central Pollution Control Board (CPCB)-in a him chin a tih, National Ambient Air Quality Standard (NAAQ) huangah a la awm thu a sawi.