Box office-ah ‘Avatar 2’ a la No.1
Avatar: The Way of Water chuan tun weekend kalta khan North America-ah cinema hall ticket hralhna atangin dollar maktaduai 15.7 lalut lehin North American box office-ah a kar sarih nan a No.1 leh a, heti hian North America-a a lakluh zawng zawng chu dollar maktaduai 621 a tling tawh a, North America-a film sum lalut tam 11-na a ni pha taw a, ram dang atangin tun weekend kalta khan dollar maktaduai 42.4 lalut lehin, US pawn lama a lakluh hi dollar tluklehdingawn 1.496 a tling tawh bawk.
Avatar: The Way of Water hian avaiin dollar tluklehdingawn 2.117 a lalut tling tawh a, heti hian film tlangzarh tawh zawng zawnga cinema hall ticket hralhna atanga sum lakluh tamah palina a ni pha tawh a ni. Film sum lalut tam ber chu Avatar film hmasa zawk kha niin, dollar tluklehdingawn 2.92 a lalut thei a, ‘Avengers: Endgame’-in dollar tluklehdingawn 2.79 lalutin a dawt a, ‘Titanic’-in dollar tluklehdingawn 2.194 lalutin pathumna a ni bawk.
Tihian film tlangzarh tawh zinga sum lalut tam pali zinga pathum chu James Cameron-a film siam vek an ni a, ani hi Titanic, Avatar leh Avatar: The Way of Water film siamtu a ni. Tuna Avatar film thar ‘The Way of Water’ hian sum lakluh tamah Titanic hi a khum ngei dawn niin a lang a, chutirualin Titanic film hia remastered 3D version chu Valentine’s Day-a cinema hall-a tihchhuah hman turin an tlangzarh thar leh dawn bawk e.
‘Puss in Boots’ pawhin a kar ruknaah dollar maktaduai 10.6 lalut lehin No.2 a la ni a, he film pawh hian US-ah dollar maktaduai 140.8 a lalut tling tawh a, film tlangzarh thar ‘A Man Called Otto’-in dollar maktaduai 6.8 lalutin No.3 a ni a, ‘M3GAN’ pawhin a kar li-naah dollar maktaduai 6.4 lalut lehin No.4 a la ni a, he film hian US-ah dollar maktaduai 82.3 a lalut tling ve ta bawk.
BOX OFFICE TOP 10:
1. “Avatar: The Way of Water,” $15.7 million.
2. “Puss in Boots: The Last Wish,” $10.6 million.
3. “A Man Called Otto,” $6.8 million,
4. “M3GAN,” $6.4 million.
5. “Pathaan,” $5.9 million.
6. “Missing,” $3.8 million.
7. “Plane,” $3.8 million.
8. “Infinity Pool,” $2.7 million.
9. “Left Behind: Rise of the Antichrist,” $2.4 million.
10. “The Wandering Earth 2,” $1.4 million.