Site icon The Aizawl Post

Box office-ah ‘Avatar 2’ a la No.1

James Cameron film siam Avatar film pahnihna ‘Avatar: The Way of Water’ chuan tun weekend kalta khan North America-ah cinema hall ticket hralhna atangin dollar maktaduai 40.6 lalut lehin, North American box office No.1 a la ni a, heti hian North America bika a cinema hall ticket hralhna atanga a lakluh chu dollar maktaduai 572.4 a tling ta.

Avatar 2 hi a boruak a la lian hle a, US pawna a lakluh zawng zawng dollar tluklehdingawn 1.33 a tling tawh a, chung zingah chuan China-a dollar maktaduai 211.8 a lakluh pawh a tel a, COVID-19 hripui len hnua Hollywood film zinga China-a sum lalut hnem ber a la ni. Heti hian khawvel huapa a sum lakluh hi dollar tluklehdingawn 1.9 a tling tawh a, tun weekend a kal leh chuan dollar tluklehdingawn 2 a lalut tling ngei tawh dawn a, film tlangzarh tawh zinga cinema hall ticket hralhna atanga dollar tluklehdingawn 2 lalut thei parukna a ni ang.

Horror movie M3GAN-in a weekend vawi hnihnaah dollar maktaduai 21.7 lalut lehin No.2 a la ni a, ni 10 chungin US-ah dollar maktaduai 60.3 lalut tawhin, a film siam nana an sum sen dollar maktaduai 12 chu a khum var var tawh e.

Chhungkaw kima en theih chi Puss in Boots: The Last Wish-in dollar maktaduai 19 lalut lehin No.3 a la ni a, he film pawh hian US-ah dollar maktaduai 112 a lalut tling ta bawk.
Marc Forster dramedy, Tom Hanks channa ‘A Man Called Otto’ chuan opening weekend-ah dollar maktaduai 15.3 lalutin, No.4 a ni a, Gerard Butler channa ‘Plane’-in dollar maktaduai 12 lalutin No.5 a a ni bawk.

Exit mobile version