Film tlangzarh thar, Neill Blomkamp direct,Orlando Bloom leh David Harbour te channa, car intlansiak film ‘Gran Turismo’ chuan tun weekend kalta khan North America-ah cinema hall ticket hralhna atangin dollar maktaduai 17.3 lalutin box office No.1 a ni. Gran Trusimo hian US ni lo ram dang 61 atangin dollar maktaduai 36.5 a lalut bawk a, tihian opening weekend-a a lakluh chu dollar maktaduai 53.8 a tling nghal a ni.
Margot Robbie leh Ryan Reynolds te channa ‘Barbie’ pawh a la che tha viau a, an tlangzarh atanga weekend vawi ruknaah dollar maktaduai 15.7 lalut lehin No.2-ah a tawlh ta a, he film hian North America-ah cinema hall ticket hralhna atangin dollar maktaduai 594.9 a lalut tling ta a ni. Barbie hian US pawnah ram hrang hrang 75 atangin dollar maktaduai 18.2 a lalut leh a, tihian US pawna a lakluh zawng zawng dollar maktaduai 745.5 a tling tawh a, a vaiin dollar tluklehdingawn 1.34 a lalut tling ta a ni.
DC superhero movie ‘Blue Beetle’-in a weekend vawi hnihnaah dollar maktaduai 12.8 lalutin No.3 a ni a, he film hian ni 10 chhungin US-ah dollar maktaduai 46.3 leh US pawnah dollar maktaduai 35.5, a vaiin dollar maktaduai 81.8 a lalut tling ve ta bawk.
Oppenheimer pawh a la kaltluang viau a, a weekend vawi li-naah dollar maktaduai 9 lalut lehin No.4 a la ni a, he film hian US-ah dollar maktaduai 300 lalut tling tawhin, US pawnah dollar maktaduai 477.1 a lalut tawh bawk a, a vawiin dollar maktaduai 777.1 a lalut tling ve ta bawk.
Liam Neeson channa action movie thar ‘Retribution’-in dollar maktaduai 3.3 lalutin No.8-ah a debut a, film tlangzarh thar bawk Dennis Quaid channa, sports drama ‘The Hill’-in dollar maktaduai 2.5 lalutin No.9-ah a debut ve bawk.
Box office-ah ‘Gran Turismo’ a No.1
