Box office-ah ‘John Wick: Chapter 4’ a No.1
John Wick fil palina, ‘John Wick: Chapter 4’ chuan tun weekend kalta khan Nort America-ah cinema hall ticket hralhna atangin dollar maktaduai 73.5 a lalut a, box office No.1 a ni. He film hian US pawnah, ram hrang hrang 71 atangin dollar maktaduai 64 a lalut bawk a, opening weekend-a a lakluh zawng zawng chu dollar maktaduai 137.5 a ni a, John Wick film tlangzarh tawh zingah opening weekend-a sum lalut hnem ber a la ni.
John Wick: Chapter 4-ah hian Keanu Reeves chu assasin thiam chungchuang Baba Yaga lemah a chang leh a, Chad Stahelski direct niin, tharum thawhna lan tamna niin, Donnie Yen, Bill Skarsgard, Laurence Fishburne, Hirotuki Sanada, Shamier Anderson, Rina Sawayama, Ian McShane leh Lance Reddick te pawh an inlan a, Lance i tun thla tir khan, film an tlangzarh hmain a thi hman hlauh a ni.
Kar kalta No.1 ‘Shazam 2′-in dollar maktaduai 9.7 lalut lehin No.2-ah a tawlh a, he film hian ni 10 chhungin US-ah dollar maktaduai 46.3 a lalut tawh a, US pawn lama a lakluh nen chuan dollar maktaduai 102.4 a tlin ve tawh bawk.
Box office No.1 hlui Scream VI pawhin dollar maktaduai 8.4 lalut lehin No.3 a la ni a, kar thum chhungin US-ah dollar maktaduai 90.4 lalut tawhin, US pawna a lakluh nen chuan dollar maktaduai 139.3 a lalut ve tawh bawk.
Creed III-in dollar maktaduai 8.36 lalut lehin No.4 a ni a, he film pawh hian US-ah dollar maktaduai 140.9 a lalut tling tawh a, ’65’-in dollar maktaduai 3.4 lalut lehin No.5 a ni a, he film pawh hian US-ah dollar maktaduai 27.9 lalut lehin, US pawna a lakluh nen dollar maktaduai 49 a tlin tawh bawk.
Box office-ah ‘John Wick: Chapter 4’ a No.1
![](https://theaizawlpost.org/wp-content/uploads/2023/03/box-3.jpg)