Box office-ah ‘Moana 2’ a la No.1
Comic book movie an tlangzarh thar Kraven the Hunter-in beisei a pha lo hle a, The Lord of the Rings: The War of the Rohirrim pawhin eng tehual a ang chuang lo, mahse, Moana 2 leh Wicked te an la chetha a, Hollywood sum chevel pawh a ziaawm deuh e.
Animated movie ‘Moana 2’ hian tun weekend kalta khan US-ah cinema hall ticket hralhna atangin dollar maktaduai 26.6 la lut lehin, North American box office No.1 a la ni a, he film hian kar thum chhungin US-ah dollar maktaduai 337.5 a la lut tling tawh a, US pawna a lak luh nen chuan dollar maktaduai 717 a tlin der tawh a, chhutmi te chuan dollar tluklehdingawn la lut thei ngei turah an ngai.
Cynthia Enrivo leh Ariana Grande te channa ‘Wicked’ pawh a la kaltluang viau a, tun weekend kalta khan US-ah dollar maktaduai 22.5 la lut lehin No.2 a la ni a, he film pawh hian kar li chhungin khawvel huapin dollar maktaduai 500 chuang a la lut tling tawh bawk.
Marvel comic book movie tlangzarh thar ‘Kraven the Hunter’-in opening weekend-ah dollar maktaduai 11 la lutin, No.3 a ni a, Marvel character behchhana film siamah chuan a che chhe ber pawl a la ni. US pawnah pawh a chuti tehual chuang lo va, ram hrang hrang 60 atanga a lak luh chu dollar maktaduai 15 chiah niin, tihian opening weekend-ah khawvel huapa a lak luh chu dollar maktaduai 26 chiah a ni.
‘Kraven the Hunter’ hi Aaron Taylor-Johnson channa niin, dollar maktaduai 110 senna film a ni a, Russell Crowe, Ariana DeBose, Fred Hechinger leh Alessandro Nivola te pawh an inlan.
Gladiator II-in dollar maktaduai 7.8 la lut lehin No.4 a la ni a, e film hian US-ah dollar maktaduai 146 la lut tawhin, US pawnah dollar maktaduai 252.6 a la lut tawh bawk.
Film tlangzarh thar ‘The Lord of the Rings: The War of the Rohirrim’-in dollar maktaduai 4.6 la lutin, No.5 a ni a, US pawnah dollar maktaduai 5.7 a la lut thei bawk.
Box office top 10:
1 Moana 2 $26,621,000
2 Wicked $22,500,000
3 Kraven the Hunter $11,000,000
4 Gladiator II $7,800,000
5 The Lord of the Rings: The War of the Rohirrim $4,600,000
6 Red One $4,400,000
7 Interstellar $3,315,000
8 Pushpa: The Rule — Part 2 $1,600,000
9 The Best Christmas Pageant Ever $1,350,000
10 Queer $790,954
Box office-ah ‘Moana 2’ a la No.1
