Kum 2016 khan a animated film an tlangzarh tawh a, a hlawhtling hle a, 2024-ah a animated film pahnihna an tlangzarh leh a, a hlawhtling leh viau tho a, tunah live-action (cartoon leh mihring tak tak chanhona ti mai ila) version an rawn tichhuak leh ta a, ‘Moana’ film chu a hit leh tho, North American box office No.1-ah a debut. Box office ranking hi North America (US a ni deuh ber) a kartawp (Zirtawpni – Pathianni) chhunga cinema hall ticket hralhna sum chetvel dan atanga teha siam thin a ni.
Disney live-action ‘Moana’ hi Dwayne Johnson leh Catherine Laga’aia te channa niin, tun weekend kalta khan North America-ah cinema hall ticket hralhna atangin dollar maktaduai 43 la lutin, box office No.1 a ni. Thomas Kail-a direct ‘Moana’ hi No.1 ni mah se beisei a pha lo riau mai a, dollar maktaduai 60 vel tal opening weekend-a la lut thei tura beisei a ni a, a film siam nan hian (marketing tel lovin) dollar maktaduai 250 vel an seng bawk si a, marketing nen chuan maktaduai 300 chuang a kai daih dawn a ni.
‘Moana’ hian US pawnah dollar maktaduai 52 a la lut thei bawk a, thian opening weekend-a a lak luh belhkhawm chu dollar maktaduai 95 a tling thei. 2016-a a animated film-ah khan Johnson hian demigod Maui tan a aw a thawh a, Auli’i Cravalho chuan Moana tan a aw a thawh ve thung.
‘Minions & Monsters’-in a weekend vawi hnihnaah dollar maktaduai 20.5 la lutin, No.2 a la ni a, he film hian kar hnih chhungin US-ah dollar maktaduai 108.2 a lalut tling ta. ‘Toy Story 5’ pawhin maktaduai 18.5 la lut lehin No.3 a la ni a, he film hian khawvel huapin dollar maktaduai 879.1 a la lut tling ta bawk.
Film tlangzarh thar dang ‘Evil Dead Burn’-in opening weekend-ah dollar maktaduai 13.7 la lutin No.4 a ni. He film hi Souheila Yacoub, Tandi Wright leh Hunter Doohan te channa niin, Evil Dead horror franchise a film parukna a ni tawh a, a original chu 1981-a tlangzarh kha a ni.
Box Office Top 10:
1 Moana $43,000,000
2 Minions & Monsters $20,500,000
3 Toy Story 5 $18,500,000
4 Evil Dead Burn $13,700,000
5 Young Washington $6,447,757
6 Invite, The $5,721,062
7 Obsession $3,800,000
8 Supergirl $3,560,000
9 Disclosure Day $3,200,000
10 Backrooms $1,485,500
Box office-ah ‘Moana’ a No.1
