Box office-ah ‘Paw Patrol’ a No.1

Box office-ah ‘Paw Patrol’ a No.1
‘Paw Patrol: The Mighty Movie’ chuan tun weekend kalta khan North America-ah cinema hall ticket hralhna atangin dollar maktaduai 23 lalutin, North American box office No.1 a ni.
‘Paw Patrol’ hi US pawn lamah pawh a che tha viau a, ram hrang hrang 45 atangin dollar maktaduai 23.1 lalut bawkin, a vaiin opening weekend-a a lak luh zawng zawng chu dollar maktaduai 46.1 a tling ta a ni. He film hi a entu zingah naupang lam an tam ber a, chutih rualin an fate enpuitu nu leh pa pawh ticket leitu zingah an tam khawp mai.
‘Paw Patrol: The Mighty Movie’ hi dollar maktaduai 30 vel senga siam a ni a, 2021-a an tlangzarh ‘Paw Patrol: The Movie’ chhunzawmna niin, 2021-a an tlangzarh kha chuan opening weekend-ah dollar maktaduai 13.1 lalutin, cinema hall-a an chhuah tawp thlengin dollar maktaduai 140 khawvel huapin a lalut thei a, a chhunzawm hi chuan sum lakluh tamah a khum ngei dawn niin a lang. A film pathumna pawh 2026-a tlangzarh tur a nih thu an puang fel leh der tawh bawk.
He film-ah hian Taraji P. Henson, Kristen Bell, Christian Convery, Brice Gonzalez, Mckenna Grace leh Lil Rel Howery ten an aw an thawh a ni.
Film tlangzarh thar ‘Saw X’-in dollar maktaduai 18 lalutin No.2-ah a debut a, he film hi dollar maktaduai 13 chauh senga siam a nih avangin a che tha thawkhat viau a ni. ‘Saw X’ hian US pawn, ram dawng 50-ah dollar maktaduai 11.3 lalut bawkin, opening weekend-a a lakluh zawng zawng chu dollar maktaduai 29.3 a tling.
‘Saw’ franchise hi 2004 atanga an siam tan tawh kha niin, a film hrang hrang sum lakluh belhkhawm chu dollar tluklehdingawn a tling tawh. He film-ah hian serial killer Jigsaw chu Mexico-ah cancer inenkawl turin a kal a, mahse, a inenkawlna damdawi ina thawkte chuan an bum tih a hrechhuak a, chung ho chu a vai hma tak dan vel tarlanna a ni.
Film tlangzarh thar bawk, sci-fi movie John David Washinton channa ‘The Creator’-in dollar maktaduai 14 lalutin No.3 a ni. He film siam nan hian dollar maktaduai 80 vel an seng a, US pawnah, ram hrang hrang 48 atangin dollar maktaduai 18.3 a lalut bawk a, tihian opening weekend-a a lakluh zawng zawng chu dollar maktaduai 32.3 a tling. A film-ah hian AI leh mihring te indona tarlan a ni.
Film tlangzarh thar dang, sakhaw rinna lam hawi ‘The Blind’-in dollar maktaduai 5 lalutin No.5 a ni. He film hi 1960s a Louisiana-a a taka thil thleng, chhungkhat paber Phil Robertson-a’n amah tibuaitu thlarau sual a hneh dan vel tarlana a ni.