Daily Newspaper

Box office-ah Spider-Man a No.1

14

Tun weekend kalta khan ‘Spider-Man: No Way Home’ chuan North America-ah cinema hall ticket hralhna atangin dollar maktaduai 52.7 a lalut leh a, box office No.1 a ni leh ta.

‘Spider-Man: No Way Home’ hian US-ah ringawt cinema hall ticket hralhna atangin dollar maktaduai 609.9 a lalut tling ta a, US-a film sum lalut tam thei 10-na a ni pha. He film hian US pawn lamah pawh tun weekend kalta khan dollar maktaduai 78.3 lalut lehin, US pawn a a lakluh zawng zawng hi dollar maktaduai 759 a tling tawh a, tihian a vaiin dollar tluklehdingawn 1.37 a lalut tling tawh a, khawvela film tlangzarh tawh zinga sum lakluh tam lamah 12-na a ni pha.
‘Spider-Man: No Way Home’ hi Spider-Man film siam tawh zawng zawnga sum lalut hnem ber niin, Sony film tlangzarh tawh zingah pawh sum lalut hnem ber a la ni bawk.

Chhungkaw kima en ngam chi film ‘Sing 2’-in dollar maktaduai 19.6 lalut lehin No.2 a ni a, tunah chuan US-ah naupang kum 5 chin-in COVID-19 vaccine an lak theih tawh avangin cinema hall-a naupang hruai an pung leh ta a, hei vang hian family film pawh a hralh a kal leh tan ta. ‘Sing 2’ hian kar hnih chhungin US-ah dollar maktaduai 89.8 a lalut tling tawh a, US pawnah dollar maktaduai 54.9 lalut tawh bawkin, a vaiin dollar maktaduai 144.6 a lalut tling ta.

Krismas vuakveta an tlangzarh thar The Matrix Resurrections leh The King;s Man ten beisei an pha lo a, King’s Man hian dollar maktaduai 4.5 lalut lehin No.3 a la ni a, kar hnih chhungin US-ah dollar maktaduai 19.5 a lalut tling tawh a, US pawn lama a lakluh nen chuan dollar maktaduai 47.8 a tlin tawh.

American Underdog-in dollar maktaduai 4.1 a lalut leh a a, No.4 a ni. He film hian ni 9 chhungin US-ah dollar maktaduai 15 a lalut ve ta.

Thawm nei lian tak The Matrix Resurrections-in beisei a pha lo a, dollar maktaduai 3.8 lalut lehin No.5 a la ni. He film hian kar hnih chhungin US-ah dollar maktaduai 30 chiah a la lut. Hetihrual hian US pawnlamah erawh a ziaawm deuh a, dollar maktaduai 75.1 lalut tawhin, a vaiin dollar maktaduai 106 a lalut ve ta.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy