Box office-ah ‘Terrifier 3’ a No.1
David Howard Thornton cenna ‘Teffifier 3’ chu box office No.1 a ni a, hetihlai hian ‘Joker: Folie a Deux’ a che chhe tluang zel a, comic book movie zinga kar khat chhunga ticket hralhna tlahniam chak ber record a siam hial a ni.
Box office ranking hi weekend (Zirtawpni atanga Pathianni) chhunga North America-a cinema hall ticket hralhna sum chevel atanga tehin siam thin a ni a, ‘Terrifier 3’ hi beisei aiin a che tha a, dollar maktaduai 18.2 la lutin box office No.1 a ni. He horror movie hi cinema hall 1988-ah chauh an tichhuak lehnghal a, heti chunga box office No.1 a ni thei hi a chet that rualin film dang chet chhiat lai a lo ni ve kher bawk a ni.
‘Terrifier 3’ hnaih bertu chu ‘The Wild Robot’ niin, he animated movie hian a weekend vawi thumnaah dollar maktaduai 13.4 la lut lehin No.2 a ni a, he film hi cinema hall 3854-ah an tichhuak ve thung. ‘The Wild Robot’ hian kar thum chhungin US-ah cinema hall ticket hralhna atangin dollar maktaduai 83.7 a la lut tling tawh a, US pawnah dollar maktaduai 148.5 a la lut tling tawh bawk.
‘Joker’ movie chhunzawmna, Lady Gaga leh Joaquin Phoenix channa ‘Joker: Folie a Deux’-in a beisei a pha lo telh telh a, dollar maktaduai7.055 la lut lehin No.3 a la ni hram. He film hian ram 77 atangin dollar maktaduai 22.7 a la lut leh a, tihian US pawna a lak luh zawng zawng cu dollar maktaduai 113.7 tling tawhin, US-a a lak luh te nen chuan dollar maktaduai 165.3 a tling ve tawh bawk.
Horror movie tho ‘Bettlejuice Bettlejuice’-in dollar maktaduai7.050 la lut lehin No.4 a la ni a, he film hian kar ruk chhungin US-ah dollar maktaduai 275 la lut tling tawhin, US pawna a lak luh nen chuan dollar maktaduai 420.3 a tlin ve der tawh bawk.
Donald Trump movie ‘The Apprentice’-in dollar maktaduai 1.6 la lutin top 10-ah a lang pha hram a. He film hi Trump hian an tlangzarh loh nan hma a la nasa viau nain a hlawhtling ta chuang lo. Cannes Film Festival-ah pawh an tichhuak nghe nge a ni.
Box office top 10:
1 Terrifier 3 $18,300,000
2 The Wild Robot $13,450,0003
3 Joker: Folie à Deux $7,055,000
4 Beetlejuice Beetlejuice $7,050,000
5 Piece by Piece $3,800,000
6 Transformers One $3,650,0004
7 Saturday Night $3,435,269
8 My Hero Academia the Movie: You’re Next Toho Interna… $3,007,420
9 The Nightmare Before Christmas $2,300,000
10 The Apprentice $1,580,000
Box office-ah ‘Terrifier 3’ a No.1
