Nipui a thaw tan dawn a, mahse, nikum summer opening weekend aiin kumin summer opening weekend-ah Hollywood box office sum che vel chu 53% zetin a hniam zawk tlat. Hetiang boruak karah hian Ryan Gosling channa ‘The Fall Guy’ chu box office No.1.
The Fall Guy hian beisei a pha lo deuh a, opening weekend-ah US-ah cinema hall ticket hralhna atangin dollar maktaduai 35 vel tal lalut thei turin an chhut a, mahse, dollar maktaduai 28.5 chauh a lalut a, heti chung hian box office-ah a No.1 zui ta tho a ni.
The Fall Guy hi chhiah (tax) leh incentive neuh neuh an pek hnuah dollar maktaduai 130 vel senga siam a ni a, opening weekend-aa sum lakluh hi a beitham ta riau a ni. Ryan Gosling hi a lar vanglai tak a ni lehnghal a, ani hi Barbie film-ah khan Ken lemah a chang a, he film-ah hian Emily Blunt nen an chang dun a, US pawna a lakluh nen chuan a vaiin dollar maktaduai 65.4 chu a hmupha tho mai.
Star Wars: The Phantom Menace-in dollar maktaduai8.1 lalutin No.2-ah a debut. He film hi 1999-a George Lucas-aStar Wars prequel trilogy chhunzawmna a ni a, an tlangzarh hun inkar a hla vang vang khawp mai, Ewan McGregor-a’n 2022-a Disney+ series-a a role Obi-Wan Kenobi role bawk a rawn chang leh a, a film kum 25 tlin champha an lawmna a ni pah nghal bawk.
Kar kalta No.1, Zendaya, Josh O’Connor leh Mike Faist te channa ‘Challengers’-in dollar maktaduai 7.6 lalut lehin No.3-ah a tawlh a, he film hian ni 10 chhungin US-ah dollar maktaduai 29.4 a lalut tling ta.
Film tlangzarh thar ‘Tarot’-in dollar maktaduai 6.5 a lalut a, No.4-ah a debut. He film hi dollar maktaduai 8 vel chauh senga siam a ni. A film-ah hian thian pasarih ten aienna, Tarot card hmanga thlarau sual an chuah zalen palh dan vel tarlan a ni. US pawna a lakluh nen chuan ‘Tarot’ hian dollar maktaduai 10.2 a tlin der tawh bawk.
Box office top 10:
1 The Fall Guy $2,85,00,000
2 Star Wars Ep. I: The Phantom Menace $80,80,000
3 Challengers $76,42,617
4 Tarot $65,00,000
5 Godzilla x Kong: The New Empire $45,00,000
6 Civil War $35,50,396
7 Unsung Hero $30,00,000
8 Kung Fu Panda 4 $24,00,000
9 Abigail $23,00,000
10 Ghostbusters: Frozen Empire $18,00,000
Box office-ah ‘The Fall Guy’ a No.1
