Box office-ah ‘Venom 3’ a la No.1
‘Venom’ film pathumna ‘Venom: The Last Dance’ chuan tun weekend kalta khan North America-ah cinema hall ticket hralhna atangin dollar maktaduai 26.1 la lut lehin North American box office No.1 a ni a, kar hnih a No.1 ta.
Venom trilogy-a a hnuhnung ber tur hian ni 10 chhungin US-ah cinema hall ticket hralhna atangin dollar maktaduai 90 a la lut tling tawh a, US pawna dollar maktaduai 68.4 la lut lehin, tihian US pawna a lak luh zawng zawng hi dollar maktaduai 227 a tling tawh a, US-a a lak luh nen chuan kar hnih chhungin khawvel huapin dollar maktaduai 317 a la lut tling ta a ni.
Box office No.1 pawh lo ni tawh The Wild Robot-in weekend vawi ruknaah dollar maktaduai 7.6 la lut lehin No.2 a la ni a, he animated film hian US-ah kar ruk chhungin dollar maktaduai 121 la lut tawhin, US pawna a lak luh nen chuan dollar maktaduai 269 a tlin tawh.
Box office No.1 hlui tho Smile 2 pawhin dollar maktaduai 6.8 la lut lehin No.3 a la ni a, he film pawh hian khawvel huapin dollar maktaduai 109.7 a la lut tling tawh bawk.
‘Conclave’-in a weekend vawi hnihnaah dollar maktaduai 5.3 la lut lehin No.4 a ni a, he film hi Oscar-ah pawh langsar thei tura beisei niin, kar hnih chhungin US-ah dollar maktaduai 15.2 a la lut tling ta.
India film panih ‘Bhool Bhulaiyaa 3’ leh ‘Singham Again’ te pawh top 10-ah an lang a. Ajay Devgn channa ‘Singham Again’-in dollar maktaduai 2.1 la lutin No.8 a ni a, Kartic Aaryan channa, horror-comedy ‘Bhool Bhulaiyaa 3’-in dollar maktaduai 2 la lutin No.10 a ni bawk.
Hollywood studio tam zawkin an film lian leh huhang nei deuh turte an tlangzarh rih lo a, November thla laihawl hnulam atan an khek rih deuh a, hei hi a chhan chu November ni 5-a US President thlan tur boruak a len rih vang a ni a, hetiang karah hian North American box office top 10-ah pawh Indian film pahnih a rawn lang ta hlawl mai niin a lang.
Box office-ah ‘Venom 3’ a la No.1
