Daily Newspaper

BP hniam ngaihthah chi a ni em?

302

“Ka BP a hniam ve deuh a!” kan tih chuan, “Engmah ngaihthat lohna tur a awm lo, i ei ti tha la a ziaawm ve leh mai ang,” te kan inti ngawt zel a. Times of India health section-in a tarlan danin BP sang ti a sawi mai theih chin hi chu a awm mai a, mahse, BP hniam chin hi bithliah fel tak a awm ve lem lo. Mihring a zirin a danglam thei. Indraprastha Apollo Hospital, Delhi-a Internal Medicine Doctor Dr Suranjit Chatterjee chuan, “BP hniam chu ngaihpawimawh a tul loh chang leh ngaihthah a pawi theih chang a awm thei. BP hniam satliah chu rilru nawm loh phah nana hman a tul lem lo. |halai thenkhat 90/60 BP nei rawn inentir an awm nual a, thil pangngai a ni e, ka lo tih sak mai thin, a bik takin amaha a rawn kal theih a, hna te a thawh theih tho bawk si chuan. Mahse, mi thenkhatin BP hniam chu insawithaih kan ching a,” a ti.

Chutihrualin BP hniam chu ngaih tih that loh a tul hun a awm ve leh tho a. Entir nan, stroke nei tawh leh lung lam chiang lo emaw, infection nei te chu an BP a hniam chuan ngaih tih that loh tur a ni. BP hniam a neih a, a luak a chhuak a nih emaw, a kua a tha lo a ni emaw, thisen chhuak a nei emaw a nih chuan doctor rawn thuai tur a ni.

Wockhardt Hospital, Mumbai-a medicine consultant Dr Behram S Pardiwala chuan, “Blood pressure 90/60 te chu bloop pressure hniam pawh a ni tak tak chiah lo. Dam lo chuan blood pressure hniam symptom a neih chauhin ngaihven tur a ni. Blood pressure hniamin a taksa peng pawimawh (thluak, kal, thin, lung)-ah nghawng a neih a, eng treatment nge a mamawh tih kan enfiah vat a tul thung a ni.

“Ka dam lo en te chu clinic an rawn luh rualin blood pressure hniam an neih chuan ka hre nghal thei ang. An hnar, ke zungtang, kut zungtang te a vawh a, an hmui a dâng (var) a nih chuan, an BP a hniam tihna a ni. Damlo rawn inentir chu amaha rawn lutin, pangngai taka thuin, a tawngah pawh harsatna nei lo va, a che vel pawh a buai loh a, a BP hniam thu a rawn sawi chuan ngaihthat lohna tur a awmin ka hre lo,” a ti.

BP chu a danglam fo chuan a chhan zawn chhuah a pawimawh. BP chu vawi hnih khat check mai a tawk lo va, ni eng emawti chhung kan BP chet vel dan check tur a ni. Hriat atana pawimawh chu damdawi thenkhat BP tihniam ve deuh thei a awm a, heng diuretics leh anti-depressant ang chi te hi.

BP hniam hi kan mut leh thut leh thawh vel vang te pawh a ni thei a, chu chu postural hypotension an ti. A chang chuan kan mu lai kan thu chhuak thut emaw, kan ding chhuak thut emaw vang te, kan thu lai kan ding chhuah thut vang emaw te pawhin reilote chhung thisen luang a titlem thei a, chu chuan kan thluaka oxygen supply a titlem a, nikhaw hre lova tluk emaw, luhai emaw te pawh a thlen thei (thawh thut luhai kan tih ang hi a ni mai awm e). Hetiang hi enkawl a ngai tihna lam lo. Chutiang thawh thut luhai nei sa te chu an mu lai emaw thu lai emaw an tho dawn a nih chuan muang changa thawh thin tur a ni.

Max Super Speciality Hospital-a Cath Lab director Dr Viveka Kumar chuan, “BP hniam te chu an chak loin, an zawi a, luhai leh lungphu rang avangin palpitation te pawh an nei thei,” a ti.

BP hniam satliah chu hetiang hian enkawl theih a ni:
1. Tui no khatah thirfian chanve vel chi (salt) al la, a tui chu in tur.
2. Thingpui leh coffee te tum khatah tam deuh ni lovin in ngun deuh tur a ni.
3. Tui in tam tur a ni a, a tlem berah ni khatah tui no 8 tal in tur a ni a, thil tuiril lam ei tam tur a ni.
4. I mu lai emaw thu lai emaw i tho chhuak tur fimkhur la, i thawh hmain i ke leh ke artui vel tiche kual vel hmasa thin la, i mu lai chu ding chhuak nghal thu lovin, thu phawt la, chumi hnuah ding chhuak chauh ang che.

5. |um khatah chaw ei teuh lovin, en zin deuh zawk tur a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy