Daily Newspaper

Brazil an tlang, Argentina an tla

25

Nilaini khan Olympic mipa football – Group match khelh zawh a ni a. Champion lai Brazil an tlang a, quarter-final an luh laiin Argentina, France leh Germany te quarter-final lut zo lovin an tla ve thung.

Brazil chakna Richarlison
Champion lai Brazil chuan group match hnuhnung berah Saudi Arabia an hmachhawn a, 3-1 in hnehna an chang. He inkhelah hian Everton forward Richarlison chuan goal hnih a thun a, Brazil a chakpui.

Brazil leh Saudi Arabia te hian inhnehtawk takin bul an tan a, goal pawh an thun hma viau. Minute 14-na lekah Brazil tan Matheus Cunha chuan hmahruaina goal a thun. Hma takah goal chhuah mahse Saudi Arabia an buai mai bik lo. Minute 27-naah Abdulelah Al-Amri chuan goal thunin an si phurh a sut a. 1-1 a inhnehtawk chungin chawlhlawk an hmang.

Second half tantir lamah team hnihte an inhnehtawk lehzual a, goal pawh a lut har hle. Hun rei tak chhung goal a luh belh theih loh hnuin hun tawp dawn hnaihah Richarlison a inlar a, Germany lakah hattrick lo siam tawhtu Everton forward Richarlison hian minute 76-naah hma an hruai nawn lehna goal a thun a. Minute 90+3-ah an goal thumna thun belh lehin an chakna a nem nghet. Goal dang luh belh tawh lovin inkhel a tawp a, tlawm nei lova group stage paltlangin Brazil chuan quarter-final an lut ta a ni.

Group A a inkhel dangah 2016 finalist Germany leh Ivory Coast chu 1-1 in an inhnehtawk ve thung. Ivory Coast lakah an chak zawh leh tak loh vangin Germany hian quarter-final an lut zo lo va, group D atangin Brazil leh Ivory Coast te an tlang.

Spain 1-1 Argentina
Group C-ah Argentina chuan inkhel pawimawh tak an hmachhawn a, hmahruaitu Spain an hmachhawn. Quarter-final lut thei turin Spain lakah chak ngei an mamawh a, an chak zawh loh vangin quarter-final an lut zo lova, an tla.

Spain leh Argentina te hi an inhnehtawk hle a, goal pawh a lut har hle. Minute 66-naah Mikel Merino chuan goal thunin Spain hma a hruai pui. Argentina hian an si phurh sut ngei tumin tan an khawh a, minute 87-naah Tomás Belmonte chuan an si phurh a sut nawlh a, chak beiseina an nei thar leh. Quarter-final lut chiang tawha ngaih Spain hian an goal an venghim tluan a, tlawm nei lova group stages paltlangin quarter-final an lut.

Group C-a inkhel dangah Egypt chuan si hnih faiin Australia an hneh a, quarter final an luh theih phah. Egypt tan hian Ahmed Rayan (44′) leh Amar Hamdi (85′) ten goal an thun. Si hnih faia an chak hi quarter-final an luhpui a. Argentina nen an point hmuh zat intluk mahse goal difference-ah an san zawk vangin pahnihnaa an ni a, pathumnaah Argentina an awm a. Argentina hnehtu Australia chu group mawngphah an ni ta a ni.

Result dang
Olympic thlengtu Japan chuan si li fai ngawtin France an sawp a, khelh thum chak zawnin point kua an hmu a, quarter-final an inhlangkai. Champion tura rinkai zinga mi Mexico chuan si thum faiin South Africa an sawp ve bawk a, Group A-ah pahnihna niin quarter-final an lut ve bawk. Group A atang hian vawikhat hnehna chang France leh hneh nei miah lo South Africa te an tla.

Group B-a inkhel pawimawh takah South Korea chuan an khingpui Honduras chu si ruk fai ngawtin an sawp a, group champion an nih theih phah. Inkhelh dangah Romani leh New Zealand te chu goal awm lovin an inhnehtawk ve thung. Group B-ah hian Point ruk hmutu South Korea chu group champion an ni a. Point li hmu ve veah New Zealand in pahnihna an luah a, quarter-final an lut. Point li hmu ve bawk mahse Romania chu uiawm takin an tla ve thung a, point thum hmuin Honduras an tla ve bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy