Brazil football hotu nih tum leh lo Ronaldo!

Brazil football hotu nih tum leh lo Ronaldo!
Kum 1994 leh 2002 World Cup-a Brazil champion-puitu Ronaldo chuan Confederation of Brazilian Football (CBF) president thar thlannaa president tang lai Ednaldo Rodrigues khin a lo tum tawh kha a thulh leh tih a puang.
. Brazil striker hlui Ronaldo hian Brazil federation presidency race-a tel a tum thu a puan atang khan he rama football hotu lawk ber thlanna tur hian ngaihven a hlawh nghal a, a campaign auhla ber pawh an ram football (national team) dinhmun tlahniam ta lutuk leh mi ngaihsan an hlawh ta lo deuh deuh chu siamthat leh a tiam a, Brazil football kan hmuh thin kha khawvela phochhuah leh a tum thu a sawi thin.
Boruak han siam hluai bawk mah se Brazil legend Ronaldo hian a saseh tak takah chuan president a chuh leh ngam ta lo niin a lang a; a inhnuhdawh chhan sawiin, Brazil rama regional federation tam zawkin an president tang lai chu an thlawp zui zel nia a hriat vang a ni!
Barcelona, Inter Milan leh Real Madrid striker hlui chuan a inhnuhdawh chhan sawiin, “Regional federation 27-te nana kan inbiakpawh vawikhatna atangin federation 23 zet chuan kawng min kharkhum,” tiin a social media channel kaltlanga a thuchhuah siamah a tarlang.
Sawizawmin, “Chu’ng federation-te chuan an kawtkaia min lo mikhual takngial pawh an duh lo a, president tang lai laka an lungawi thu leh inthlan leh huna an vote leh tur thu min hrilh a ni,” a ti.
Brazil rama regional federation 27-te hian president thlanah vote thum theuh neiin, Brazil Serie A lama top-flight club 20-te’n vote hnih theuh an nei a, second-tier Serie B club 20-in vote khat theuh an nei thung.
Ronaldo chuan federation hruaitute’n Rodrigues an la thlawp zui zel chu a zahsak lo thei lo tih sawi chungin president chuh ve a tum chungchanga sawihopui theih takngial pawh an ni lo leh a laka an inhawng duh tlat lo erawh pawi a tih thu a tarlang tel.
“Federation-te hi vote nei tam berte an nih miau avangin anni thlapwna tel lo chuan ka tan chuh zui zel ngaihna a awm lo.
“Ka laka an inkharkhip tlat avangin ka project buatsaih ve takngial pawh ka phawrh (present) thei lo a, kan ram national team-in tunhmaa a ropui thinna a neihlet leh theihna tura ka ruahmanna leh suangtuahnate pawh sawipui theih an ni lo,” a ti.
Ronaldo a inhnuhdawh leh tak avangin president tang lai Rodrigues bawk hi nakkum inthlana ‘candidate’ awmchhun a nih tak hmel.
Kum 48 mi Ronaldo hian ram tan game 98 khel tlingin, football a chawlhsan hnuah coaching lam a luhchilh thawm hriat a ni lo a, a thau mum kung kung a; engemawlai khan an ram national team tlahniam ta lutuk avangin CBF president chuh a tum thu a puang a, mahse, thlawptu a neihchhiat em avangin a inhnuhdawh thu hriat tur a awm zui ta a ni.
Rodrigues-a term kal lai hi March 2026-a tawp tur niin, presidential election chu tun atanga thla 12 hnua huaihawt tur a ni.
World champion vawinga ni thei awmchhun Brazil hian kum 2002 hnu lamah he trophy hi an hawn leh ngai ta lo a, kum 2014 kha an rawn thlensan leh deuh niin semi-final an thleng.
Ronaldo hi World Cup chanchina goal khung hnem ber pahnihna niin, match 19 a khelh atangin goal 15 a thun tling a, all-time top scorer list-a a phak loh awmchhun chu Germany legend Miroslav Klose kha a ni.
Kum 17 chhung international football a khelh chhung khan Ronaldo hian World Cup trophy pahnih bakah Copa America title pahnih leh Olympic bronze medal pakhat a hlawhchhuak bawk.
Kum 2011-a Ronaldo international career a tawp hnu khan Brazil hi Copa America-ah vawikhat chiah an la champion a; World Cup hnuhnungber kum 2022 tournament-ah khan Croatia chuan quarter-final stage-ah an hnawtchhuak.