Brazil ramah
MotoGP kirleh dawn
Kum 22 ngawt an ram atanga bike intlansiak level sang ber lakbo a nih hnuah kum 2026 atang khian Brazil ramah MotoGP a kirleh dawn.
Brazilian Formula 1 world champion hlui thi ta Ayrton Senna hming chawia Goiania khuaa tlankawng an siam Ayrton Senna circuit-a kum nga chhung MotoGP race nghat turin inremna an ziak phawt a, contract an ziah ang chuan kum 2030 thleng Brazil-ah hian an tlan phawt ang a, contract pawhsei zel lam chu hunin a la hril ang.
Brazil ram laili taka awm Goiania khua hian kum 1987-89 chhung khan MotoGP hi a lo mikhual tawh a, chu mi hnu kum 1992 khan Sao Paulo lamah championship an sawn a, kum 1995 atanga 2004 chhung khan Rio de Janeiro lamin championship a thleng ve thung.
MotoGP thuchhuah chuan an race thlirtu an pun zelna tur kawngah South America chu an market pawimawh a nih thu tarlangin, 2025 calendar atana race 22 an tinzawn zingah Argentina pawh a tel tih an tarlang.
Thla hmasa mai khan Spaniard Jorge Martin chuan Barcelona khawpuia season kharna race-ah pathumna dinhmun luah chungin a career-a a vawikhatna atan MotoGP title a hlawhchhuak.
Brazil ramah MotoGP kirleh dawn
