Daily Newspaper

British finance Minister fakhlawh Rishi Sunak

3

Rishi Sunak chu Britain finance minister-ah politics a luhchilh hnu kum nga lekah hlankai niin a la naupan leh tawnhriat neih tlem em em chunga dinhmun sang leh pawimawh chelh thei a ni tlat.

Tunah ngat phei chuan hruaitu tha sawiah a hming tel zel tawhin Britain sorkarin coronavirus pandemic a beihletna kawnga sawiselna tam takah pawh sawisel ve loh a ni.

Kumin May thla khan Sunak hi kum 40 a ni chauh a, kum 2015-ah parliament ah lut tanin kum 2018 khan sorkar-ah leihlawn rahka hniam ber a zawh tan chauh a ni.

Kumin February thlaa finance minister Sajid Javid a ban khan Prime Minister Borish Johnson chuan Britain-a political position pawimawh ber pahnih chelh turin a dah thut mai a ni.

Khatih lai khan Johnson-a’n inthlana chakna a chan phahna Britain-in post-Brexit hnua economy a kalpui dan tura ruahmanna a neih te enkawltu tur Sunak chu hriat hlawh lo tak a ni.

Budget a pharh hmasak ber chuan fak a hlawh nghal em em a, mahse, a taka kalpui hma in coronavirus pandemic-in a nuai ta a ni.

Lockdown avanga mipui ten harsatna an tawh chhakw nan Sunak chuan thutlukna huaisen tak tak siamin sorkar sum hmangin furlough scheme te siamin chu chu lockdown avanga hna chan te chhawm dawlna tur a ni.

Restaurant meal atana public money thenkhat thehchhuah a kalpui chuan fak a hlawh hle a, a thawhpui leh boss ber Boris Johnson te larna a tlakhniam laiin ani chu a sang tual tual thung.

“Kawng tam takah Sunak hi British political prodigy a ni,” tiin Guardian columnist Andy Beckett chuan a sawi a. “Nal takin a tawng a, a tawngsual khat hle a, suit a inhmeh bawk,” tiin a ziak.

Political veteran pakhat chuan Tatler magazine hnenah Sunak chuan Tony Blair, kum 43 mi lek nia kum 1997 a prime minister ni thei kha a hriat chhuah tur thu a sawi bawk.

Sunak hi a business career avanga mihausa a ni a, Britain aiin India ramah a nupui Akshata avanga hriat hlawh zawk a ni.

A nupui hi India business magnate Narayana Murthy, India a IT outsourcing firm lian ber dawttu Infosys dintu fanu a ni.

Sunak hi Britain-in Hindu chancellor of exchequer (finance minister) a neih hmasak ber niin parliament-a rinawmna thu a tiamah pawh Bhagavad Gita a hmang.

Kum 1980 chhova piang zinga ram office pawimawh pali tih mai: prime minister, finance minister, foreign secretary leh interior minister chelh thei awm chhun a ni bawk.

Sunak hi England hmar lama Conservative seat nghet Richmond, Yorkshire MP a ni a. Kum 2015 khan party leader hlui leh foreign secretary hlui WilliamHague atanga a chhawm a ni a, Hague hian Sunak hi fak hle in ‘mi pangngai chunglam’ a tih a ni.

Theresa May khan January 2018 ah parliamentary under-secretary of state niin local government, park vel enkawltuah a dah a.

Sunak pi leh pute hi Punjab chhuak niin eastern Africa atangin kum 1960 chhovah khan Britain-ah an pem a.

Sunak pa hi Southampton-a family doctor niin a nu chuan damdawi dawr a nei thung.

May 12, 1980 khan Southampton-ah piangin, Winchester College, Britain a private boarding shcool tha ber zinga miah a zir a.

Local Indian restaurant-ah a inhlawh lawp lawp hnuah Sunak chuan University of Oxford lutin philosophy, politics leh economics-ah first class honours degree-in a graduate a ni.

Chumi hnuah Fulbright scholarship hmangin Sunak chuan Stanford University, California atangin business administration master degree a la leh a ni.

A nupui Akshata nen hian Stanford-ah intawngin California-a an chen hnuah Britain-ah an let leh a. Fanu pahnih Krishna leh Anoushka neiin kum 2009 khan Bangalore-ah an innei a ni.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy