Site icon The Aizawl Post

BRO hotu in hmalakna larsap hrilh

BRO hotu in hmalakna larsap hrilh
Border Roads Organisation (BRO) hotu ber, director general Lt.Gen. Rajeev Chaudhry chuan Thawhtanni tlai khan Raj Bhavan-ah larsap Hari Babu Kambhampati a hmu a. Mizorama Project Pushpak-in ramri hrula kawngpui siam hna a thawh chungchang leh thil pawimawh dang a sawipui.
BRO hotu hian April 2 khan Project Pushpak-in a thawh mek Champhai – Hnahlan – Khuangphah Road a endik tih a sawi a. Champhai district bawrhsap bakah Ngur khuaa khawtlang mipui nen an inkawmna thu te a sawi. Mizorama Project Pushpak hnathawh meka an hmasawnna leh thlenchin a hrilh bakah Mizorama project thar an la khawih leh turte a sawipui bawk.
Larsap chuan Border Roads Organisation hotulu leh a hnuaia Project Pushpak Mizorama hnathawkte chungah lawmthu a sawi a. Mizoram chuan BRO kawng laih leh enkawl an chhawr tangkai a, an hmalakna an thlawp chhunzawm tih a lo hrilh. Project Pushpak hnuaiah hnathawh mek chu a chhawrtu tur mipuiin an mamawhna a san tawh em avangin a hun taka thawh zawh a nih theih nan theihtawp chhuah turin a chah.
DGBR hian chief minister Zoramthanga leh chief secretary Dr Renu Sharma te pawh a kawm a ni.

Exit mobile version