Hollywood star Bruce Willis, kum 67, chuan aphasia a nei tih an puanzar hnu lawkah a chungten a hriselna chungchangah thuchhuah dang an nei leh ta a, he action star hian frontotemporal dimentia (FTD) a nei tih an puang. Kum khat dawn kalta khan a nupui Emma Heming Willis, a nupui hlui Demi Moore, a fate Rumer Willis, 34, Scout Willis, 31, Tallulah Willis, 29, Mabel Willis, 10, leh Evelyn Willis, 8, te chuan Bruce Willis damlohna chungchang hi thuchhuah siamin, “Ka chhungkua chuan in hmangaihna kan tana luang chuak zawng zawng avangin lawmthu sawia bul tan lo thei kan ni lo…Chutiang karah chuan kan hmangaih, kan pa leh kan thian hriselna chungchangah hian a thil tawn hriatthiamna thuk zawk kan nei ta a ni,” an ti.
FTD hi kum 60 hnuailam tan chuan dementia lan dan tlanglawn a ni a, a natna hi hriatchhuah mai a harsa riau a, chuvangin rin ai takin FTD nei hi mahni inhre si lo kan tam niin mithiam ten an sawi. A enkawlna hmuhchhuah a la ni lo.
March 2022 khan Willis chhungkua chuan an pa ber hian aphasia a nei tih an puang a, hetiang nei hi titi leh thil sawipui an harsa riau thin. Aphasia hi thluak lam chiang lo avanga awm a ni deuh ber a, thluakah pawh tawng lam hriattheihna a tibuai deuh ber niin John Hopkins chuan an tarlang.
Bruce Willis hi action movie Die Hard changtupa niin, he film hi a lar pui hle a, hei bakah hian a channa hrang hrang zingah The Sixth Sense, Pulp Fiction, Moonlighting, Sin City leh Moonrise Kingdom te pawh a tel.
Bruce Willis-a’n Frontotemporal Dementia a nei
