Belgium leh Sweden-te’n Euro 2024 qualifier an khelh ni taka Bru-ssels khawpuia tual-thahna thleng lam kha han luhchilh thui deuh dawn ila.
Khatia inkahna a thleng tih leh mikhual supporter pahnih an thih thu hriat a nih hnu khan Belgian police-te chuan tualthattu silai keng chu an man nghal mai lo a, hei vang hian fimkhur thilah team pahnih player leh fan-te chu an himna atan King Baudouin Stadium chhuahsan rih lo turin an hriattir nghal.
He inkahna hi inkhel tan hma darkar tam vak loa thleng ni mah se game a tibuai zui ta tho a, pawikhawihtu an man mai loh avang leh mikhual team lamin hlauhthawn an neih zui tlat avangin halftime-ah inkhelh tihtawp an dil a, Uefa thuneitute’n halftime thlenga inkhelh kha an pawmpui ta a, an khelh hmabak chhunzawm tur ti lamin thu an dah lo.
Sweden team haw tur pawh hi police escort chungin airport thlenpui an ni a; khawpui chhunga Sweden fans chevel pawh poilice lamin an veng bawk.
Belgium police-te chuan mi pahnih kap-hlumtu chu Brussels khawpuiah Thawhlehni khan an kaphlum ta tih an puang.
Inkhel tan hma darkar engngemawzat kaltaa tualthahna thleng daih si halftime laia Sweden lamin inkhel laklawh lai tihtawp an ngen chhan kha mak kan lo ti deuh mai thei a, a hnuah Sweden manager Janne Andersson chuan amah leh player-te’n Thawh-tannia inkahna thleng kha halftime laiin an hre ve chauh tih a sawi a, Belgium police lamin an supporter pahnih thih thu kha match tan hmain an lo hrilh reng reng lo tihna a nih hmel!
Andersson chuan, “Chawlhlawk hmang tura ka kal laiin inkahna thleng chungchangah informa-tion ka dawng ve chiah a, a tirah chuan min tihder mai mai emaw ka ti a, kan chenna khawvel tak hi chu aw…
“Inthlakna pindan ka pan ding nghal a, team lam pawhin an lo sawi-khawm ve mek a, kan fans nunna chan ta leh an chhungte kan tawrhpuizia lantirna’n khelh chhun-zawm tawh loh chu zaa zain kan remti ta a ni,” a ti.
Brussels khawpuia nunna chan ta pahnihte kha an team inkhel en tura kal an ni chiah em tih he thu buatsaih lai thleng hian nem-nghehna a la awm lo.
Swedish FA leh Belgium team bakah Belgian Prime Minister Alexander de Croo pawhin social media kaltlangin sunna thu a tichhuak ve bawk.
Sweden captain leh Manchester United defender ni bawk Victor Lindelof chuan Belgium kha Euro 2024 khel tura tling tawh an nih avang leh Sweden tana qualify ngaihna a awm tawh loh avangin a bul atanga khelhthatleh emaw an hmabak khelh zawh emaw tulna a awm loh thu a sawi.
Brussels shooting bihchianna
