Site icon The Aizawl Post

BSF helin raltlan luh belh zel

Chittagong tlang dunga Zofa mi engemaw zat chu Mizoramah an raltlan mek a, Krismas hma atang khan BSF te’n lo dangin, mi engemaw zat an kirtir tawh. Chuti chung chuan lut thar hi an la awm zel.

January ni 19 khan raltlan 25-te chuan BSF helin Hmawngbu an thleng a, anni hi chhungkaw pasarih niin, Hmawngbu-ah hian an la awm rih tih thu dawn a ni. January ni 15 khan BSF hel bawkin mi 56-te’n Chamdar P an lo thleng tawh bawk. Anni hi chhungkaw 22 an ni a, Chamdur P atang hian Vathuampui panin, hetah hian an awm tih thu dawn a ni.

Chittagong tlang dunga Zo hnahthlakte hi an la ralmuang lo a, inkap bur bur rih lo mah se sipaiin mi an man a, hrehawm taka an awmtir thin avang te, inkah a hnai em tih te ngaihtuah renga awm a ngaih avangtein an ralmuang lo a, Mizorama tlanchhiat hi an duh reng tih thu dawn a ni.

BSF te’n an kirtirte pawh mahni khuaah an awm ngam lo a, khuaa lut lova ramhnuaia awm leh khaw thenawma awm rih an tam zawk tih thu dawn a ni.

Mizoram pan tuma mahni khua chhuahsan, an chin hriat rih loh an awm nual bawk nia hriat a ni a, Mizorama tlanchhiat duh, chhuak ngam si lo an awm teuh nia hriat a ni bawk.

Exit mobile version