Site icon The Aizawl Post

BSF-in dang mah se raltlan luh belh

Chittagong Hill Tracts, Bangladesh atanga Mizorama tlanchhiat tumte BSF-in lo dang thin mah se raltlan lut thar an awm leh tih thu dawn a ni.
Thu dawn danin, January ni 15 khan Bangladesh atangin Mizoramah raltlan 56 an luh belh a, chhungkaw 22 vel an ni.
BSF te duty-na hmun helin, a hun la rei zawngin mi 56-te hian Mizoram an lut a, an hmaa mite anga Parva III pan lovin Chamdur Project an pan a, chuta tang chuan Vathuampuiah kalin hetah hian an awm rih tih thu dawn a ni.
BSF an duty avang hian Mizoram pan tum engemaw zat chu Mizoram panin an chhuak ngam lo a, Chittagong Hill Tracts hi an la ralmuan loh avangin tlanchhe duh hi thahnem tak an awm nia sawi a ni.
BSF hian Mizorama tlanchhiat tum mi engemaw zat an lo dang tawh a, an nawr kir thin. Kir lehte zinga a tam zawk fe chu Bangladesh an thlen hnuah pawh mahni khuaa lut ngam lovin ramhnuaiah an awm a, khaw thenawma biru an awm bawk tih thu dawn a ni. An kirtir zinga mi, kawng laka boral Pastor Sawmkhup pawh kha an khua Chaihkiangah vui lovin Salopi khuaah an vui a ni.
Bangladesh Refugee Relief Committee, Mizoram te chuan raltlan hi mi 474 an ni tawh niin an sawi a, a tam zawk fe chu naupang leh hmeichhia nia sawiin, kum upa lam an ni hlawm bawk tih sawiin, mipa thalai an tam lo tih an sawi bawk.
Exit mobile version