Aizawl Municipal Corporation Ward No.VI by election neih turah Aizawl North-III bialtu MLA, minister K Sapdanga chu mi harsa zawkte tana chenna in siam, BSUP Edenthara chengte vaua tawngah an puh bakah model code of conduct a kalh tih MNF Thalai leh Congress Thalai chuan sawiin, ngaihdam dil turin an phut.
Thawhtanni khan MNF office kawtah MNF Thalai Hqrs. leh Congress Thalai Hqrs. hruaitute hian lungawilohna lantirin, UD&PA minister Pu K Sapdanga hian a bial Aizawl North-III huamchhunga by election neihna tur veng pakhat, Edenthar Whatsapp group-ah, BSUP-ah MNF vice president Dr R Lalthangliana leh MPCC senior vice president Lalnunmawia Chuaungo an kal fo thu sawiin, campaign tawp ni ah chiang fek fawkin, BSUP-a chengte chu an vote thlakna an hre vek dawn a, tute nge luah zui zel tlak an thlir nawn dawn tih hrilh tur leh, opposition party enkawl nge ruling party enkawl an duh zawk thlantir tura zawh a rawtna thu a sawi niin an sawi a ni
Hei hi BSUP Edenthar Venga chengte chungtlakna leh inpalzutnaa an ngaih bakah minister hian inthlan model code of conduct a kalh mai pawh niloin, midang rikrapna leh vauna a tel avangin Representation of Peoples Act1951 kalh a ni tih an sawi.
‘Congress sawrkar laia sak BSUP Edenthar, Rangvamual, Lawipu, Durtlangah hian chenna in leh lo nei lo mi harsa zawkte tan, duhsak bik nei loin a remchan dan ang zela luahtir an ni thin a. MNF sawrkar chhung pawhin chu chu kal dan phung a ni. Inthlan dawn hnaiha hetianga midang ti thlabar leh rikrap zawnga Home minister-in a nihna hmangsual a, mi a vau ta mai hian a bial chhung leh AMC bial 6-na mipui a ngaihnep zia a lantir a, hun kal tawhah hetianga invauna leh thu thinthawng hi hriat tur a awm ngai lo,’ an ti.
BSUP-a chengte laka tawngkamah ngaihdam dil turin minister an phut
