Daily Newspaper

BTS ‘Dynamite’ a Hot ber

9

Korean boy group BTS chuan record siamin an hla ‘Dynamite’ chu Billboard Hot 100 (singles) chart-ah an No.1 a, tihian South Korean act hlang anga he chart-a No.1 thei hmasa ber an ni.

Billboard Hot 100 (singles) chart hi US-a kar khat chhunga hla lar ber tihna a ni a, all-genre US streaming, radio airplay leh sales data te chu chart ranking siam nana pawimawh a ni.

South Korean group, member pasarih J-Hope, Jimin, Jin, Jungkook, RM, Suga leh V te telna BTS hi Hot 100 chart-a an No.1 vawi khatna a ni a, March thla khan an hla ‘On’ chu chart No.4 a lo kai tawh bawk.

Dynamite hi August ni 21 zanlaia an tlangzarh niin, kar khat chhungin US-ah vawi maktaduai 33.9 stream niin, 3,00,000 an hralh bawk a, radio airplay pawh maktaduai 11.6 a kai pha a ni. ‘Dynamite’ hi Digital Song Sales chart-ah pawh a No.1 bawk.

BTS tan ‘Dynamite’ hi he chart-a an hla top 10 kai thei palina a ni a, ‘Boy With Luv’ featuring Halsey (No.8) leh ‘Fake Love’ (No.10) te pawh Top 10-ah a lo lang tawh bawk.
BTS hi south Korean group hlang anga he chart-a No.1 thei hmasa ber an ni a, he chart-a Asian an No.1 lohna a rei ta vang vang hle a, a hnuhnung ber chu Japanese Kyu Sakamoto niin, June 1963 khan a hla ‘Sukiyaki’ chu kar thum chhung a lo No.1 pui tawh a ni.

He chart-a kar hnih chhung No.1 tawh Cardi B ‘WAP’ featuring Megan Thee Stallion chu No.2-ah a tawlh a, Drake ‘Laugh Now Cry later’ featuring Lil Durk chu No.2 atangin No.3-ah a tawlh a, he chart-a kar sarih chhung No.1 thei DaBaby ‘Rockstar’ featuring Roddy Ricch chu No.3 atangin No.4-ah a tawlh a, The Weeknd ‘Blinding Lights’ pawh No.4 atangin No.5-ah a tawlh ta bawk.

Jack Harlow ‘Whats Poppin’ featuring DaBaby, Tory Lanez leh Lil Wayne chu No.5 atangin No.6-ah a tawlh a, chart No.1 hlui Harry Styles ‘Watermelon Sugar’ chu No.7-ah bawk awm lehin, SAINt JHN ‘Roses’ pawh No.8-ah bawk a la awm a, Jawsh 685 leh Jason Derulo ‘Savage Love (Laxed – Siren beat)’ chu No.7 atangin No.9-ah a tawlh ve ta bawk.

Top 10 atanga chhuak tawh Lewis Capaldi ‘Before You Go’ chu top 10 khartu niin, No.12 atangin No.10 a kai thar ve leh ta bawk.

(THE AIZAWL POST – Thalaite Huang)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy