Site icon The Aizawl Post

BTS-in Guinness World Record an siam

BTS-in Guinness World Record an siam
K-pop group BTS chuan Spotify-a group stream nasat ber niin, Guinness World Record an siam a, BTS hla te hi Spotify-ah vawi tluklehdingawn 31.96 stream a ni tawh a, 2021-a record an siam lai nena khaikhin chuan a let hnih dawnin strem a pung hman tawh a ni. 2021 khan Coldplay lehpelin, Spotify-a group stream nasat ber record an siam a, he record hi anmahni vekin an rawn khum leh ta a ni.
Hei bakah hian record dang pawh an siam a, group zinga Nickelodeon Kids’ Choice Awards dawng hnem ber an ni a, he award hi pasarih an dawng tawh. Hei bakah hian social media lamah pawh record siamin, Instagram, Twitter leh TikTok-a music group follower ngah ber an ni bawk.
Hetihrual hian BTS hi an member pakhat sipai-a a tan tak avangin an chawl rih a, HYBE chuanBTS member pasarih te hi sipai-ah an inziak lut vek dawn niin an sawi a, sipai an tan zawh vek hnu, 2025 velah an tikhawm leh thei chauha an rin thu an sawi.
HYBE label chairman Bang Si-hyuk chuan March ni 15-a Gwanhun Forum-a zawhna leh chhanna hunah BTS an comeback leh hun tur zawhna chhangin, a hun tur bituk fel engmah a awm lo niin a sawi a, hetihrual hian band member te privacy zah sak turin mipui a ngen nghal bawk a ni.
Bang chuan BTS hian HYBE nena an contract an tinung thar leh tawh rih lo niin a sawi a, chutih rualin an company chuan contract ziak leh turin hun an la ngah niin a sawi a, tunah hian an contract hi a la tawp lo a, contract renewal chu a hunah an sawi ho tur thu sawiin, “Kan sawi ho hnuah kan la puang ang chu,” a ti bawk.
BTS hian an anthology album ‘Proof’ an tlangzarh hnu lawk, June 2022-ah group activity chawlhsan rih an tum thu an puang a, solo lamah an kal ta deuh dial a. January ni 30 khan an member Jin chuan South Korean army a zawm a, thla 18 chhung sipai-ah a tang dawn a, member dangte pawh sipai-a la tang vek tur niin, an in ziah luh hun tur erawh an la puang lo.

Exit mobile version