Billboard Boxscore-in a tarlan danin BTS chuan May ni 2-28 chhung khan show vawi 12 neiin, ticket 6,41,000 an hralh a, dollar maktaduai 127.8 an hmuchhuak thei a, group anga thla khat chhunga tour atanga sum hmu hnem thei ber an la ni.
A hmaa hetiang record siamtu chu The Rolling Stones niin, anni hian August 2019 khan thla khat chhungin tour atangin dollar maktaduai 95 an hmuchhuak a, he record hi BTS chuan 35% vel zetin an rawn khum ta a ni.
BTS hian April thla pawh khan thla khat chhungin dollar maktaduai 75 an hmuchhuak a, Top Tour chart-ah kum li chhunga a vawi khat nan No.1 an lo ni tawh bawk a, May thlaah pawh an No.1 title an la hum ta zel a ni.
BTS hi Top Tour chart-ah hian vawi li an No.1 tling tawh a, May thla hi thla khat chhunga an sum hmuh tam ber a la ni a, group anga thla khat chhunga concert atanga sum hmu hnem ber an nih rualin, solo artist te pawh lak tel chuan an May sum hmuh hi a palina niin, Beyonce, Kendrick leh SZA te an pha lo.
BTS hian ARIRANG World Tour an nei mek a, he tour hi April thla atang khan an tan a, April aia May-a an sum hmuh punna hi 68% a ni a, ticket sales punna erawh 54% a ni. April thla khan Japan leh South Korea lam an hrut a, May thlaah North America an lut a, USA-ah show vawi kua neiin, Mexico-ah vawi thum an nei bawk. Japan leh South Korea aiin USA-ah hian an concert ticket man hi a to zawk a ni.
BTS-in The Rolling Stones record khumin tour record an siam
