BTS hla thar tur ‘Take Two’ chu June ni 9-ah an tlangzarh dawn chauh a, tunah chuan Billboard Hot Trending Songs chart-ah a No.1 der tawh. Billboard Hot Trending Songs chart hi Twitter-a kar khat chhunga khawvel huapa hla sawi nasat leh titi pui nasat tehna a ni a, kar tin Zirtawpni aTanga a karleh, Ningani thlenga khawvel huapa Twitter-a rimawi leh a kaihhnawih sawi hlawh ber leh ngaihven hlawh ber, thawm nei lian ber a ni mai e.
‘Take Two’ hi an group kum 10 tlin champha puala an hla tihchhuah thar tur niin, June ni 9-a tlangzarh tur niin, May ni 30 khan he hla thar tur chungchang hi an puang chauh a ni. BTS hi June ni 13, 2013-a debut kha an ni a, kumin hi an group kum 10 tlin champha a ni.
‘Take Two’ hi an tlangzarh hunah chuan kumina BTS-in kumina an hla an tlangzarh pahnihna a ni dawn a, ‘The Planet’ dawttu tur a ni. The Planet pawh hi Billboard chart hrang hrangah langin, Digital Song Sales chart-ah pawh No.6 a ni.
Hot Trending Songs chart hi 2021 aTanga Billboard-in an tih Tan chauh a la ni a, BTS hian he chart-a No.1 thei hla pakhat ‘Yet to Come’ an nei tawh a, June 2022 khan a No.1 a, tunah ‘Take Two’ hi an hla he chart-a No.1 thei pahnihna a ni ta a ni.
BTS ‘Take Two’ an tlangzarh hmain chart-ah a No.1!
