Buaina a chhuah atanga kum hnih dawnah Manipur CM a bâng ta
Manipur Chief Minister N Biren Singh chu an state-a chi leh chi inkara buaina a chhuah atanga kum hnih dawn hnuah an state BJP chhunga a kaihhruai rintawk lohna leh Congress-in a sorkar rintawk lohna motion put luha buk tuma hma an lak mek laiin a bâng ta.
Chief minister hian Pathianni khan governor hnenah a bânna a thehlut a. Congress chuan ‘tlaikhawhnua bân’ chu thiam inchantirna engmah lo a nih thu an sawi.
Chief minister ber a bân takah hian Thawhtanni atanga budget session an tan tur pawh Governor Ajay Kumar Bhalla chuan thulh thu a puang lehnghal.
BJP hian tun hnaiah Conrad Sangma kaihhruai, National Peoples’ Party (NPP) thlawpna hlh mah se MLA ngah zawk an ni tho va, hetih lai hian an party chhung ngeiah pawh a kaihhruai ringtawk tawh lo an awm nia sawi a ni a, hei hi rorelna ina eptuten buk an châk chhan pawh a ni.
Hetiang boruak karah hian chief minister hian an party hotu lian zawkte thu rawn angin bânna a thehlut ta nia ngaih a ni.
Singh-a hi Pathianni tuk khan Delhi-ah a kal a, party chief JP Nadda leh an chief strategist, Union Minister Amit Shah a hmu.
May, 2023-a an state-a chi leh chi inkara buaina chhuak tanchhanin MLA 12 vel chuan hruaitu insiksawi an duh a, mi dang paruk pawh derthawng tak an awm bawk nia hriat a ni a. Assembly speaker leh chief minister thu a inhmu lo nia sawi a awm bawk.
Singh-a duh tawh lotu MLA-te hian Shah hi an lo kawm tawh nghe nghe.
Congress-in assembly session-ah Singh-a sorkar rintawk lohna put luh tumin hma an la mek a, bukna tak pumpelh tumna avanga hetianga ti hi nia rinna pawh a awm.
Hetih lai hian tun hnaia Maharashtra, Haryana leh Delhi assembly inthlana hnehna chang, BJP chuan an mite zinga lawmna leh chanchin lawmawm awm mek chu Manipur-a fel lo awm hian a hliah an duh lo nia sawi a awm bawk.
Manipur BJP chief A Sharda Devi chuan chief minister hian state inpumkhatna vawn nun nan leh mipui thatna tur zawkin thutlukna a siam tih a sawi.
“Kum 2017 atang khan Singh-a hi Manipur hmasawn nan a thawk nasa em em a. Hetianga bânna a thehlut ta hian kan state himna atana a inpekzia a lantir a ni,” a ti bawk.
Singh-a thlaktu tur hi tihfel a la ni ta lo tih a sawi bawk.
Congress hruaitu, Rahul Gandhi-a chuan X-ah na takin thu a tar lang nghal a. “Biren Singh-a bâng hian mipui nawrna na tak a awm tih a lantir a, Supreme Court chhuina leh Congress-in rintawk lohna put lut tumna nen a na em a ni,” a ti.
“Kum hnih dawn BJP hruaitu, Chief Minister Biren Singh-a hian Manipur-ah inthen darhna a kalpui a. Prime Minister Narendra Modi-a’n tharum thawhna, nunna chânna leh India lungphum tichhe turin phalna a pe a ni,” a ti.
“Congress chuan chief minister leh a council of minister-te rintawk lohna hi naktuk (Thawhtanni)-a put luh tumin hma a la a. Chutiang thil chu a thlirin a bâng ta ringawt a ni,” tiin Jairam Ramesh pawhin X-ah a tar lang.
“Hei hi May, 2023 tir lama Manipur-a buaina a chhuah atanga Congress-in an duh a ni a. Chief minister hi a bang har mah mah tawh a ni,” a ti bawk.
Singh-a hi an state-a intibuai meka lehlam, Kuki-te chuan an duh lo hle a, Supreme Court-ah chief minister ber hian tharum thawhna a tipunlun tiin chhui tura ngenna an thlen a. Hei hi chief minister-in thu a sawina audio tape put ru behchhana an tih a ni.
Hlawkna um lo mi mal forensic laboratory, Truth Labs chuan audio tape-a aw lang chu Singh-a aw nen 93% zetin a inmil niin an sawi.
Supreme Court chuan Central Forensic Science Laboratory atangin audio tape chhui chianna a ngaichang mek bawk.
Buaina a chhuah atanga kum hnih dawnah Manipur CM a bâng ta
