Kum khat leh a chanve Manipur-a buaina thleng tawh chu ta tawp theihnan sawrkar laipui leh Manipur sawrkar chu theihtawp chhuah turin Mizoram sawrkarin a ngen.
Mizoram sawrkar chuan thuchhuah siamin, Manipur tualchhung buaina kalzelah tunhnaia buaina chhuak avanga hliam tuar leh nunna chan engemawzat an awm chu pawi a tiin, he buaina avanga hliam tuar leh nunna chan leh an chhungte zawng zawng a tuarpui takzet tih a sawi.
Manipur tualchhung buaina chuan kum khat leh thla ruk a awh tawhin, mipuiin nasa takin an tuar tih a sawi a. He buaina avang hian Manipur atangin Mizoramah sahimna zawngin mi engemawzat an lut a, Mizoram sawrkar leh mipuiin theihtawp chhuahin anmahni chhawmdawl hna an kalpui, tiin, ‘He buaina avanga kan unaute chhawmdawlna lo pe thin tute chungah hian Mizoram sawrkar chuan lawmthu a sawi a. Buaina hi a tawp theihnan sawrkar laipui leh Manipur sawrkar chu theihtawp chhuaha hma la chhunzawm turin kan ngen a ni,’ a ti.
Tunhnaia Manipur buaina kaihhnawihah tumahin Mizorama hnam leh hnam inhmelmakna tichhuak thei tur zawnga hma la lo turin mitin a ngen tih Mizoram sawrkar thuchhuah hian sawiin, ‘Mizorama hnam dang, a bikin Manipur state amite himna turin sawrkar chuan hma a la zel dawn a. Chutiang bawkin Mizoram pawna cheng Mizote, a bikin Manipur-a zirlaite leh hna thawka awmte himna turin hma kan la zel dawn a ni,’ a ti.
Buaina tihtawp thuai tum turin Mizoram sawkarin centre ngen
