Bualte daia leimin vangin
lirthei tangkhang thahnem
National Highway 54 siam mekah Lunglei leh Lawngtlai inkar Bualte khaw daiah Inrinni khan lei a min a, Pathianni chawhnu lam thleng khan a la tlang loa, khualzin tangkhang engemawzat an awm tawh.
Thudawn danin, leiminna hi Lunglei district tualthu leh thaizawl inkar, Bualte atanga chhim lam km.3 velah a ni a, ruahtui a tlak leh deuh hnu August 2 (Inrinni) zing dar 8.00 vel khan leimin thu hi hriat a ni a, helaia kawng laitu BRN Infrastructure chuan Hitachi excavator rawn thawhchhuah puiin, then a ni a, chawhnu dar 1.00 velah tih tlang niin, lirthei tangkhang zinga a chanve vel an chhuak hman tihin, a min belh leh a ni. Excavator-in then leh a tum lai, chawhnu dar 2.00 velah lei hi tam zawka rawn tawlhin excavator hi a hnawl a, operator hi eng tin tin emaw zuang chhuakin thi loa ruangin a chhuak a, mi tlawmngaiten chirhdiak karah hruizen hmangin an hnuk chhuak a ni.
Leimin thenfai hleihtheih a nih tak loh avangin Bualte YMA chuan lirthei tangkhang 50 chuang, henga chuang mi 200 chuang tan zanriah an siamsak a, an riahna tur pawh an ngaihtuah sak a ni. Hetiang bawk hian Bualte lam pan chiah lo, tualthu leh thaizawl lamah pawh lirthei tangkhang an awm nual a, khawtlangin an lo buaipui ve bawk. A bikin tualthu ah hian mi 100 vel an tangkang nia hriat niin, Pathianni tuk pawh khan YMA chuan inkhawm loin an ei leh in tur an buaipui sak a ni.
BRN Infrastructure ho excavator hian theih ang angin leimin hi thianfai mah se, a tam tham em avangin tih tlang mai theih a ni loa, Pathianni tlai thleng khan a la tlang lo a ni.
Bualte daia leimin vanginlirthei tangkhang thahnem
