Buarchepah Assam che leh tan
– Lalrinsanga Ralte
Vairengte ram chhunga Assam Police-in hmun an rawn khuar avanga Mizoram Police nen an inkahna chu, a tu ve ve mahin kut thlak rih lo tura thu dah a nih laiin tunhnaiah Assam lam hian chet an rawn la leh nasa tawh hle tih MLA Lalrinsanga Ralte chuan a sawi.
Thawhtannia Assembly Session-ah Serlui bialtu MLA Lalrinsanga Ralte hian, sawrkar hmasa hunlaia Assam Police-in Vairengte mi Lalnuntluanga huan chhunga hmun an rawn khuar avanga Mizoram Police nen an inkah phahna lai chu ‘status quo’ a dah a nih mek laiin, tunhnaiah Assam lam an rawn che leh a, huan neitute sangha dil an sah sak bakah kawng an lai a, an kawng laihah hian block an phah bawk tih a sawi.
Buarchep tlanga Mizoram Police duty post pahnih awm thin, tunhnaia lakchhuah a nih thu pawh sawiin, hei hi Mizoram sawrkarin a hria em, tih leh, hma lak a tum dan a zawt a ni.
Home minister K Sapdanga chuan hemi chungchang hi House-a chhang nghal turin chhan sual palh theih a nih avangin ziakin a la rawn chhanlet tur thu in Serlui bialtu MLA hi a hrilh a ni.
Buarchepah Assam che leh tan – Lalrinsanga Ralte
