Finance changtu chief minister Lalduhoma chuan sawrkarin budget a pharh turah cheng vaibelchhe 1095 chu leiba awmsa kumina rulh ngei ngei ngai rulhna atan an dah dawn tih a sawi.
Thawhlehnia Aizawl Lammuala State Day of Prayer hmannaah chief minister chuan, Budget Session nei meka budget an pass turah state-in lei a lo bat tawh leh a pung (interest) nena rulhna tur cheng vaibelchhe 1095 an dah dawn a. Hei hi kumin chhunga pek ngei ngei ngai a ni tih a sawi.
“Kan budget pumpui hi vaibelchhe sing tha awrh a ni a, chumi atanga vaibelchhe 1000 chuang leiba rulhna atana a kal ral nghal ngawt mai tur hi a uiawm lutuk a. Chutiang dinhmuna din chuan tawng huai a har,” a ti.
GSDP (Gross State Domestic Product) atanga kan leibat en chuan, kum engemawzat chhung chu India rama leiba ngah ber state kan lo ni tawh tih a sawi bawk. “Leibat tipungtu chu corruption te a ni. Hei hi a bo chuan thui tak kan intodelh nghal ang. Cheng nuai 20-a zawh theihah nuai 100 te kan sen zel chuan a hek lutuk,” a ti.
Pathian thu atanga kan hmuh danin, a thupek kan zawm chuan hnam intodelh, hausa leh dingchhuak min tiam a, hnamdang hnena puk tir a, amah ringtute chu puk ve lo tura min tiam laiin, vawiina Mizoram sawrkar chu leiba in a delh bet reng a; puk chawp hlira inenkawl ram, ba ngah em em sawrkar an ni mek tih a sawi a. “Enga tinge puk chawpa kan awm a, enga tinge leibaa kan khah. Chakna nilo, thiltihtheihna ni hek loin, ka thlaurau zawkin le, tih hmangin he leiba thang atanga chhuak tur hian kan dil ang,” tiin mipui tawngtai dan tur a sawi a ni.
Budget-ah leiba rulhna tur cheng vbch. 1095 dah tum
