Budget aia tam leiba nei dinhmuna dahtu rin ngam ring lo
Ningani khan AMC Ward-I, Durtlangah Durtlang MNF-AMC Campaign Committee buatsaihin Aizawl Municipal Corporation Election 2026 MNF Campaign Kick-Off neih a ni a, he huna thusawitu Lalruatkima, MNF treasurer chuan, “Kan state budget aia tam leiba nei dinhmuna min dah mektu leh chhiah tam tak tipung a, ram mipui min dahkham mektu state sorkar lai mekte hi AMC enkawl turin an rin ngam ka ring lo,” a ti.
AMC Election 2026 lo awm turah Pathianin candidate tha tak tak, thiamna lamah te, Kohhran leh khawtlang rawngbawlna thleng pawha mi chhuanawm tak tak min pe a, Pathian leh Aizawl mipuite zarah Aizawl khawpui enkawl zui turin sorkarna kan siam ngei kan beisei tlat a ni, a ti a, inthlan hmachhawn tur hian sum leh pai leh thil dangah innghat lovin MNF innghahna Bible chang neih sa Sam 20:7 hi hre thar chungin Lalpa kan Pathian hming lam hmasa zel tur kan ni a; chu chu MNF innghahna awm sa reng leh kan chakna hnâr ber pawh a ni, a ti.
State sorkarah leh AMC-ah MNF kaihhruai sorkar awm tawh te’n Mizoram leh Aizawl khawpui hmasawnna an thlen tawh dan hrang hrangte sawiin, Pathian, Ram leh Hnam dah pawimawh hmasa zel chunga ram enkawl thin MNF kutah AMC enkawlna pawh dah zui zel a him ber dawn a ni, a ti.
AMC Election 2026 lo awm turah Mizoram chhung leh pawna cheng Zofa zawng zawngte Jerusalem Aizawl khawpui hmasawn zelna tur te, ram chhunga chengte leh ram pawn atanga rawn tlawhtute tan pawh khawpui nuam leh mawi zawk, khawpui him zawk leh kawng hrang hranga Aizawl khawpui cheina tura hmalakna tur ruahmanna ‘MNF-AMC Election Manifesto’ te ngun taka min lo zir chian sak chunga Ward-I MNF Candidate leh Ward tina MNF Candidate zawng zawngte khawngaih taka lo vote tling theuh turin Aizawl mipuite a sawm nghal a ni.
AMC Ward-I MNF candidate CL Biakhlua pawhin thu a sawi a, Aizawl khawpui leh Ward-I hmasawn zelna tura ka thiamna leh theihna te ka hman chhuah ngei theih nan khawngaih taka min vote theuh turin ka ngen che u a ni, tiin Ward-I mipuite a sawm.
Budget aia tam leiba nei dinhmuna dahtu rin ngam ring lo
