Mizoram annual budget 2024-25 sawihona (General Discussion) zawhfel a ni a; member-te an inbuatsaih thain sawihona pawh a ngaihnawmin a bengvarthlak hle. |um danga budget pawn lam tuipui hluai ang boruak kha tun tumah hi chuan a tlem ta deuh niin a lang a, mahse zeh tel hram dan zawng ngar ngar pawl erawh an awm tho.
General discussion dawtah hian minister-te chanpual department hrang hranga sum dah dan sawihona neih a ni leh dawn a. |um dangah chuan he hun hi member tam takin hun remchangah lain, mahni bial chhung harsatnate minister hnena thlenna hun remchangah an hmang thin a, budget lam sawi ri mang lote pawh an awm thin. MLA-te hi dem hleih theih an nih lohna lai a awm ve a; a chhan chu, bialtu-in bial mamawh leh harsatnate a sawi chhuak em? tih hi an lo thlir dan a ni ve lo thei lo va. Bial mamawh pawh sawi chhuak lo bialtu nih kha legislator-te pawhin an lo hreh ve bawk. Chumi piah lamah, House chhunga bial mamawh leh harsatnate sawi chhuah chuan ngaihsak leh ngaih pawimawh a hlawh zual bik tura ngaihna a awm a; chu chu a nih dan pawh a ni fo. Hei hi a chian em emna chu, sitting neih leh hunah inchhuahchhalhnan hman zui a nih zel vang a ni a. Minister tan pawh mipui ngaihsaklohna anga a lan theih avangin eng emaw in-tawng-bat an lo nei nge nge a, chu chu a lehlamin an beisei ran thin bawk.
Budget discussion-ah hian bial mamawh leh harsatnate thlen loh tur tih dan a awm hran lo a nih pawhin, ram rorelna in sang berah ngaihtuah bik tur neia thukhawm an nih angin legislator-te hi chuan budget chungchanga an duh dan, an hmuh dan, an thlir dan, fakselna felfai takin an sawi chhuak thiam ve tur a ni a. ‘Budget hi chu a har a, mi nazawng hriatthiam theih pawh a ni lo a…’ ti liam mai thin legislator an awm a nih chuan, mipui aiawha ram leh hnam tana rorelna ina thu turin a in fit chiah lo tihna a ni thei ang. MLA ni thei chin hi chuan budget chungchang hi chu hrethiam turin an zir ve mai tur niawm tak a ni; inthlanah pawh an tling thiam alawm le…
Budget Discussion leh a behbawm…
