Site icon The Aizawl Post

BUDGET: Hmasawnna hnathawh nan 21.90%

Mizoram Budget 2023-24 chu nimin khan finance minister Zoramthanga, chief minister chuan House-ah a pharh ta a. Kum 2023-2024 chhunga Mizoram sum hman tur House pass pui tura a pharh hi Cheng Vbch 12,112.97 a ni.
Budget-ah hian, estimate pum pui atanga 78.10% chu loh theih loha hmanralna awm sa (Revenue Expenditure) heng —sawrkar hnathawk hlawh leh pension bakah revenue expenditure dang neuh neuh atan dah a ni a. A bak zawng 21.90% chu ram hmasawnna hna thawhna (Capital Expenditure) atan a ni ve thung.

Budget hi hetia han en thuak hian mi naran tan pawh ram hmasawnna hna thawhna tur sum a tlemzia a hriat theih mai awm e.

Capital Expenditure hnuaia Sectoral Allocation hrang hrang han thlir hian, Economic Services Sector hnuaiah Agriculture and allied services te, rural development te, irrigation & flood control te, industries and mineral te, communication te, science & technology te, environment te, civil supplies leh a dangte hian budget pumpui atanga 19.79% an inhman tawm dawn a. Han sawr zim leh zel ila, kuthnathawktu tam ber fuankhawmna agriculture and allied services bika hman tur hi a tam thei lo hle tih a lang nghal bawk.

Thawh chhuah kan neih tam ve loh avang hian sawrkar laipuiin state 28 te hnena an thawh chhuah tam dan nena inmil tura tax cheng Vbch Nuai 10.21 a sem rualna Tax Devolution atangin 0.500% kan chang ve a, chu chu Cheng Vbch 5,107.25 niin, hei hi kan sum hnar lian ber a ni.

Kan dinhmun atang hi chuan budget lian han nei thei kan nih lohzia chu revenue receipts atang hian a lang chiang hle a. Leiba lah a kum telin a pung chho zel a ni si a. Budget pharhtu finance minister-in a sawi angin, sum tam zawk kan thawh chhuah theihna tur policy decision khirhkhan zawk siam tura kan inbuatsaih hi a tul takzet a. Thawh chhuah nei lo tan chuan a hmanralna lam insumkar dan ngaihtuah a, chumi atana hmalakna hmasaah chuan inrenchemna lam hi na taka kalpui kan mamawh phawt ni berin a lang ta a ni e.

Exit mobile version