Site icon The Aizawl Post

Budget session boruak

Ni 15 chhung awh budget session chu nimin February 28 khan zawhfel a lo ni ta a. Tun term chhunga budget session hnuhnung ber a nih tawh bakah, inthlan kum te a lo ni a, House member-te an tangin House chhung boruak a tang thei hle a; member ten ‘election oriented’ zawngin an thluk deuh hram thin niin a ngaih theih.
Tun tum session-ah hian Leiba bakah, PMJVK scheme hman dan leh Airport leh a kaihhnawih Kamrula te an lar hle a. |awngkam dengkhawng deuh hleka han invawm zauh zauh te, indiriamna tawngkam anga ngaih theih tur te pawh a ri deuh zauh zauh thin a. Ngaihdam dil ngai khawpa House chhunga thudik tawk lo sawi te, mipui rilru hliam na khawpa tawng chhuah avanga ngaihdam dil ngaihna te a awm bawk a.
Session neih chhunga ngaihdam dilna vawi hnih ngawt a thleng kha tun tum session danglamna pakhat a ni a. Private member resolution pahnih, opposition member lam atanga putluhte pawm a ni pawh he session danglamna hi a ni bawk. Hei bakah hian opposition lam atangin private member bill a lut bawk a, opposition lam an tlem rem rawm viau na a, an thawhhlawkin House chhung an al hneh hle a, mipui lam tan pawh session ngaihnawm, hmuhnawm leh hlawkthlak tak a nih a rinawm. Hetih lai hian, member zingah a subject matter pel thui deuh deuh erawh an awm thin. Speaker leh Deputy Speaker te an che tha.
Demand sawihona erawh, member tam zawk chuan budget dinhmun han chip a, han lepse lam aiin, mahni bial chhung mamawh thlenna hun atana hmangtu an tam zawk niin a lang; leiba tam tak nei chunga budget pharh a ni a, chutih rualin thawhchhuah nei tlem kan nih avangin hmasawnna hna thawhna tur sum dah tam a ni lo.
Ei leh bara intodelhna lam hawiin khel a hlawh vak lo va, environment lam phei chuan hun a chang tlem hle. He thil pahnih hi ram hruaitute hian mutmawh hnarmawha an neih a hun takzet tawh a ni.
Thlirtu lamah, Live chat hmangtute tawngkam hman a dengkhawng thei hle a, hei hi tih dan tur emaw tia thangthar zel ten an rawn entawn atan thil tha lo tak niin a lang.

Exit mobile version