Budget Session neih turah State University Bill pharh hman tum

Mizoram State University dinna tur bill buaipui mek a ni a, Budget Session awm turah hian sawiho atan House dawhkana pharh hman tum a ni tih Higher & Technical Education commissioner & secretary H Lalengmawia chuan a sawi.
Ningania Pachhunga University College-a hun hmanah H&TE commissioner chuan, National Education Policy 2020-in kum 2035 hnulamah affiliated college awm a phal dawn tawh loh avangin, tuna Mizoram University hnuaia college-te an awm ang hian an awm thei tawh dawn lo a. State sawrkarin sum harsa chung chungin state university din turin ruahmanna a siam a, a bill pawh peih a ni tawh tih a sawi. State university chu a hautak lo thei ang berin, clustered university-a din tum a ni a. College leh institution hrang hrang hman tangkai tum a ni tih a sawi bawk.
PU College Mizo Department-in “Thangliana Kutchhuak leh Sulhnu Zir Chianna” (National Seminar on Thomas Herbert Lewin’s Legacy and Contributions to Mizo Literature) tih an buatsaih a hmanpuinaah H Lalengmawia hian hei hi a sawi a. Kum 2019-a Prime minister-in a thua a hawn tawh, Mizoram Engineering College pawh central-in a nawr nasat tawh avangin, kum 2026 session-ah chuan subject pali velah a taka class tan hman tum a ni tih a sawi.
Thangliana chanchin leh a hnathawh chu zirchian tham leh zirchian tlak a ni tih H&TE commissioner hian a sawi a. “Mizo hnam kha a hmangaih tak tak nge ‘diplomacy’ a thiam vang tih leh, Mizo nula ‘Dari’ nupuia a neih pawh Mizo a hmangaih vang nge Mizo society-a tlaktlum a duh vang, tih pawh zirchian tham a ni,” a ti.
Thangliana (TH Lewin) hi Mizo hawrawpa thuziak hmasa ber, ziaka Mizo chanchin dah hmasa leh Sap tawnga Mizo thawnthu dah hmasa ber nia hriat a ni a. Vailen vawikhatna (The Lushai Expedition 1871-1872) a Zoluti (Mary Winchester) lalettu, kum 1872-a Mizo lal 7 leh an thuihhruai mi 27-te Kolkata-a zinpuitu a ni. Mizo nula Dari nupuiah a nei a, Mizoram tihmasawn turin ruahmanna tam tak siamtu a ni. A chanchin hi lehkhabu engemawzata ziah leh tarlan a ni tawh a, ama pual seminar erawh a vawikhatna nia hriat a ni.
‘Thangliana Kutchhuak leh Sulhnu Zir Chianna’ seminar-ah hian Mizoram chhung leh pawna mithiam tak tak mi 30 dawnin paper an present a. Seminar hi vawiin, February 7-ah neih chhunzawm a ni ang.