Buh tuh leh seng laiin ni 100 inhlawhna thar kal dawn lo

Buh tuh leh seng laiin ni 100
inhlawhna thar kal dawn lo
Thingtlanga chengte tana sawrkar laipuiin inhlawhna thar a duan – VB G RAM G chu buh tuh leh buh seng laiin kalpui a ni dawn lo tih Rural Development and Administration minister Prof Lalnilawma chuan a sawi.
RD&A department chuan Thawhtanni khan Aizawlah state huapin sawrkar laipuiin kumin July 1 atanga hman tan a tum – Viksit Bharat: Guarantee for Rozgar and Ajeevika Mission (Gramin) kalpui dan tur inhrilhriatna a buatsaih a. MGNREGA thlakna tur VBG RAM G chunchang inhrilhfiahnaah hian sawrkar department aiawh, All Mizoram VC Association hruaitute leh Mizoram Journalists’ Association member-te an tel.
Hmanpuitu RD&A minister chuan, VB G RAM G hi kumin July 1 atangin India ram pumah hman tan a ni dawn a. Chumi atana inbuatsaihna kalzelah state level atanga village level thleng orientation leh public outreach (Jan Samvaad) neih mek zel a ni tih a sawi. Mizoramah pawh inbuatsaihna nasa taka kalpui niin, the Mizoram VB G RAM G Scheme 2026 chu Council of Ministers-in a pawm hnuah chhuah a ni a. India rama VB G RAM G Scheme kalpui dan tur chhuah hmasaber state kan ni tih a sawi a ni.
VB G RAM G hnuaia ni 60 chhung chawlh (seasonal pause) chungchang pawh Mizoram chuan ruahmanna leh hmalak dan tur a duang tawh tih sawiin, “Seasonal pause chhung hian VB G RAM G-a hna reng reng thawh phal a ni loa, thingtlangmiten buh tuh leh buh seng laia anmahni leh midang hnena an inhlawh theihna turin seasonal pause hi duan a ni,” a ti.
Kum hnih chhung atan Ministry of Rural Development chuan ni 100 daih inhlawhna ‘Labour budget’ a pawm tawh a, kuminah chuan ‘normative allocation’ hmanga sum hi pek tur a nih avangin labour budget approach-in a kal lo thung tih a sawi a ni.
VB G RAM G thiltum pawimawh chu ram pum huapa hmasawnna ngelnghet neih a ni tih Prof Lalnilawma hian a sawi a. Viksit Bharat@2047 atana mitin leh department hrang hrang inpuahchah nasat a ngai a, thingtlang khawtin pawh mahnia intodelh tura ke pen a pawimawh tih a sawi.
He hmalakna kawng atana pawimawh chu hnathawh inthlunzawm (convergence) niin, department hrang hrang atanga hnathawh hi convergence tha taka kalpui a nih theih ngei a beisei tih a sawi a. VB G RAM G atana state matching share pawh Finance department-ah dil mek a ni tih a sawi bawk.
MGNREGA an lo kalpui thin danah duhthusam a ni em, he scheme hian thingtlangmite a chhawmdawl tha tawk em tih ngaihtuah let a ngai tih minister hian a sawi a. VB G RAM G-in a ngaihpawimawh water security chungchangah pawh department hrang hrang thawhho that a pawimawh tih a sawi a ni.