Site icon The Aizawl Post

Buhfai leinan nuai 18000 hmang Tualchhung thar lei duh reng

Kum 2001 -2022 chhung khan Mizoram sawrkarin ration buhfai leina atan cheng nuai 18000 chuang a seng a, Mizorama buhfai thar chu sawrkarin a lei duh reng tih Supply minister K Lalrinliana chuan a sawi.

Assembly Session-a zawhna chhangin FCS&CA minister chuan National Food Security Act hnuaiah AAY leh PHH te tan ration buhfai kg. khat zelah Rs. 0.45 sawrkarin a chawi a, non-NFSA (card var) te tan ration buhfai kg. khat zelah Rs.13 sawrkarin a chawibelh.

Mizoram sawrkarin kum khat chhung, 2021 – 2022 sawrkar kuma buhfai leinan Rs. 1,88,35,47,184 a seng a. Tunah hian Mizoramah buhfai stock quintal 170117.08 awmin, buhfai stock a tha tawk tih a sawi a ni.

‘Sawrkar laipui atanga normal allocation hmuhte FCI kudam atanga a hun taka phurh chhuah a nih theihna’n sum tul angte dah lawk vek thin a ni a. Non-NFSA dawng turte tan thla tina ration buhfai mamawh zat chhutchhuakin a hun taka sem a nih theihna’n department chuan lo lei lawkin, a thlenna tur kudam zawng zawngah lo dah lawk vek thin a ni a, hetianga department-in hmalakna mumal tak a neih reng avang hian vawiin thlengin mipuiin ration buhfai lak chungchangah harsatna sawrkarin a nei ngai lo,’ minister hian a ti.

Sawrkar laipuiin PHH chhungkuate tan ration buhfai thla khatah kg.5 a thlawna a pek chu January atang khan Mizoram sawrkar pawhin a kalpui tan a, February atangin a hma ang thoin PHH tan bik kg.3 dang man neiin an pek belh dawn tih a sawi.

Mizorama buhfai tharte chu state sawrkarin a lei duh reng a, an lei theihna rate hman mek chu kg. ah Rs. 27.50 niin, tunah India ramah buhfai man a to avangin tihsan tuma buaipui mek a ni tih a sawi. OMP rate neih ang zelin a man hi bithliah theih a nih a rin thu K Lalrinlian hian a sawi. “MNF sawrkar hnua state chhunga thar buhfai kan lei duh thu chief minister-in a sawi kha kan la kalpui reng a, amaherawhchu tun thlengin Bilkhawthlir atanga quintal 23 chiah kan lei bak lei tur kan la hmuh belh lo,” a ti.

Exit mobile version