Mizoram Baptist Kohhran hnuaia nu pawl chuan sawrkar kum kalta chhung khan buhfaitham atangin cheng nuai 1100 chuang an hmu.
Baptist Church of Mizoram Finance department tarlan danin, 2023-2024 sawrkar kum chhungin buhfaitham atanga BCM sum hmuh zat chu a vaiin Rs. 11,23,96,958 a ni.
Kum 5 kalta chhung khan BCM Buhfaitham atanga sum hmuh chu – 2019 – 2020 kumah Rs. 8,52,22,908 a ni a; 2020 – 2021 kumah Rs. 9,06,84,956; 2021 – 2022 ah Rs. 8,87,79,713 niin hemi kum hian kum hmasa lam phak lohna chu Rs. 19,92,878 a ni. 2022 – 2023 ah Rs. 10,43,02,982 niin, 2023 – 2024 ah Rs. 11,23,96,958 a ni a, kum hmasa lam khumna hi Rs. 80,93,946 a ni. 2021-2022 kum tih loh hi chu kum hmasa lam an khum vek a ni.
Mizoram Baptist Kohhran Ni pawimawh (Special Sunday) zingah “Buhfaitham Pathianni” hi a tel a, kuminah chuan April 28 khan hman niin, kumin thupui chu Thufingte 11 : 24 thu “Sem darh chu pun lehzualna a ni” tih a ni. Tualchhung kohhran tinah hmangin, zing inkhawmah thuchah sawitu in thupui thlansa hmanga thuchah a sawi bakah buhfaitham chanchin inhrilhhriain tualchhung kohhran buhfaitham report ngaithla-in infuihthar a ni.
Kum 1973 BCM Assembly chuan buhfaitham rawngbawlna hi tualchhung kohhran kutah a dah a. Baptist Kohhran Hmeichhe Pawl (BHKP) chuan a khawn a, kohhranin a buaipui thin. Kum 1982 atangin Assembly-in BHKP kutah mawhphurhna zawng zawng a dah a. Sum tlingkhawm hi tualchhung kohhran kaltlangin ramthim (Mission) lamah chhunluh thin a ni.
Hetihlai hian Baptist Kohhran Hmeichhe Pawl (BKHP) hian May 2 khan an din champha vawi 86-na an hmang a. Kumin BKHP Day thupui chu “Tho la i Pathian ko rawh” (Jona 1:6) a ni. MBKHP atanga ruahman leh ngenna siam angin, hemi ni zingkar leh chhun lama hun hmang theite chuan khawtlang tana thil tha tihna atan hmangin, khawlai tihfai hna an thawk a, zan lamah BKHP Day puala inkhawmin, thupui thlansa hmangin thuchah ngaihthlak a ni. Hemi Ni pual inkhawm thawhlawm hi Mission Field leh kohhran harsa zual tanpui nan hman tura ruahman a ni.
MBKHP statistics report 2024-a tarlan danin, tunah hian BKHP hi Pastor bial 92-ah Unit 464 dingin, member 34304 an awm a ni.
Buhfaithamah nuai sang hmu tling
