ITI Veng High School building chu sak pum lohin zirtirtuten zirlaite class an lakpui a, hemi chungchang enfiah hi MPCC treasurer Dr Lalmalsawma Nghaka leh MPCC Education Cell chairman Anggu Lalhmachhuana te chuan Thawhtanni khan an enfiah.
Congress hruaitute sawi danin, ITI Veng High School hi kum 1992 a din a ni a, kuminah zirlai 70 neiin, pawl 10 zirlai 33, pawl 9 zirlai 37 an ni a, zirtirtu 8 an awm. Adhoc grant -in- aid niin kum 2023 inthlan hnaih khan sawrkarin sawrkar sikulah a hlangkai a. Tun sawrkarin cancel-in an dinhmun ngaiah an let a, school uniform-ah ‘Govt. HS’ anga an lo chhut tawh avangin an buai phah hle tih sawi a ni.
An school building hi a chhe tawh hle a, tui a far nasa in, a chung slab a chhiat avangin ceiling atangin cement a tla thin a. A building hi cheng nuai 64. 05 senga sakthat mek niin, building hlui structure ringa sak theih a nih laiin, contractor tana senso tlem zawk a nih avangin a kawt zawl hmun remchangah building thar sak a ni a, feet 14.5 chhungkhung niin, a chhung a tet em avangin school-in thutthleng an neih sa pawh a leng lo a, a thar an siam phah a ni.
School building thar hi MNF Block hotute hna nia sawi a ni tih MPCC hruaitute hian sawiin, ZPM a sawrkar tak hnuah Schoool Education directorate lam miin a enkawl /leisak nia hriat a ni. Kumin June atang khan hnathawktu hmel an hmu ngai tawh loa, school building sak hi tu mawh ber nge tih an sawi thei lo. Tunah hian a building hlui hi luah tlak a nih loh avangin building thar sak zawh la ni lo mah se, luah loh theih loh a ni. Kawngkhar leh tukverh siam ala ni loa, kawmchhak lungrem pawh foundation mumal lo a nih avangin a min a hlauhawm hle tih sawi a ni bawk.
Building sak pum loha class lakna school dinhmun enpui
